Lezhë, 1 shtator 2026 — Dy vite pas plagosjes me armë zjarri të Agron Pukës pranë një shkolle 9-vjeçare në fshatin Rrilë të Lezhës, Prokuroria ka kërkuar pushimin e akuzave ndaj tre personave të proceduar për ngjarjen.

Kërkesa është paraqitur në gjykatë nga drejtuesi i Prokurorisë së Lezhës, Arben Nika, pas përfundimit të hetimeve të kryera nga prokurorja e çështjes, Irena Sufja.

Sipas organit të akuzës, gjatë hetimit nuk janë siguruar prova që të lidhin shtetasit me inicialet V.T., K.N. dhe A.K. me përplasjen me armë të ndodhur mëngjesin e 6 marsit 2024 në Rrilë.

Për këtë arsye, Prokuroria ka kërkuar pushimin e procedimit për akuzat “Vrasje me paramendim”, e kryer në bashkëpunim dhe e mbetur në tentativë, si dhe “Mbajtja pa leje e armëve, armëve shpërthyese dhe municionit”.

Krahas pushimit të akuzave, Prokuroria ka kërkuar edhe shuarjen e masës së sigurimit personal të vendosur ndaj tre personave nën hetim me vendimin nr. 690-120, datë 9 mars 2024, të Gjykatës së Shkallës së Parë të Juridiksionit të Përgjithshëm Lezhë.

Vendimin përfundimtar mbi kërkesën e Prokurorisë do ta marrë gjykata, e cila do të vlerësojë materialet e hetimit dhe kërkesën për pushimin e çështjes.

Ngjarja ndodhi mëngjesin e 6 marsit 2024, kur Agron Puka u qëllua me armë zjarri pranë shkollës 9-vjeçare në Rrilë, pak pasi kishte shoqëruar fëmijët e tij në shkollë.

Sipas të dhënave të hetimit, Puka i është kundërpërgjigjur të shtënave duke përdorur armë zjarri. Pas përplasjes, ai mbeti i plagosur dhe u dërgua në spital për të marrë ndihmë mjekësore.

Policia e arrestoi Pukën në spital, ndërsa hetimet vijuan për identifikimin dhe përcaktimin e përgjegjësisë së personave të dyshuar për përplasjen me armë.