27 vatra zjarri janë evidentuar në territorin e Shqipërisë gjatë 24 orëve të fundit, ndërsa katër prej tyre vijojnë të jenë aktive. Sipas të dhënave të Ministrisë së Mbrojtjes, katër vatra të tjera mbahen nën monitorim, ndërsa strukturat e emergjencave civile dhe Forcat e Armatosura vijojnë ndërhyrjet në zonat problematike.

Në total, për menaxhimin e situatës janë angazhuar **432 forca operacionale dhe 43 automjete zjarrfikëse**, të mbështetura nga **70 efektivë ushtarakë dhe tre helikopterë të Forcës Ajrore**. Përgjatë ditës së sotme parashikohet shtimi i angazhimit ushtarak në Bulqizë, Mat dhe Tiranë.

Katër vatrat aktive

Në **Dajt të Tiranës**, zjarri vijon në drejtim të Qafë-Priskës. Sipas autoriteteve, flakët nuk paraqesin rrezik për zonat e banuara. Në operacionin e një dite më parë morën pjesë forca zjarrfikëse, të Agjencisë së Zonave të Mbrojtura, ushtarakë dhe një helikopter.

Në **Vajkal të Bulqizës**, zjarri ka prekur një sipërfaqe të gjerë me shkurre dhe dëllinja. Terreni shkëmbor dhe i vështirë po e komplikon ndërhyrjen e forcave në terren. Për shuarjen e flakëve janë angazhuar zjarrfikës, punonjës të strukturave pyjore, vullnetarë dhe trupa të Forcave të Armatosura.

Një tjetër vatër vijon në **Lundre të Matit**, ku zjarri ka përfshirë një sipërfaqe të konsiderueshme pyjore. Në operacion janë përfshirë rreth 40 forca të strukturave zjarrfikëse dhe pyjore, 20 ushtarakë dhe një helikopter.

Në **Urën e Shtrenjtë, në Shkodër**, flakët vijojnë në një terren të thepisur, çka e bën më të vështirë ndërhyrjen. Forcat në terren po punojnë për izolimin e vatrës dhe frenimin e përhapjes së zjarrit.

Katër zona nën monitorim

Përveç vatrave aktive, strukturat e emergjencave po monitorojnë situatën në **Qafën e Helmës në Bulqizë, Qafën e Lugut në Korçë, malin e Qukësit në Prrenjas dhe Zhejën në Kurbin**.

Sipas Ministrisë së Mbrojtjes, në këto zona nuk raportohet aktualisht rrezik për banesat apo zonat e banuara.

Agjencia Kombëtare e Mbrojtjes Civile vijon koordinimin me prefekturat, bashkitë dhe strukturat e tjera të Mbrojtjes Civile, ndërsa ekipet operacionale mbeten në terren dhe në gatishmëri për ndërhyrje të menjëhershme.

Prioriteti i operacioneve mbetet mbrojtja e jetës së njerëzve, banesave dhe pasurisë, ndërsa situata po ndiqet në mënyrë të vazhdueshme në të gjithë vendin.