Tre persona kanë humbur jetën në një aksident tragjik të ndodhur në orët e para të mëngjesit të së martës në Athinë, Greqi.

Ngjarja është regjistruar në bulevardin Alexandras, në kryqëzimin me rrugën Armeni Vraila, ku dy motoçikleta janë përplasur me njëra-tjetrën.

Sipas informacioneve paraprake, në njërin prej motorëve udhëtonte një burrë, ndërsa në motoçikletën tjetër ndodheshin dy gra. Përplasja ka qenë e fortë dhe ka rezultuar fatale për të tre personat.

Të plagosurit u transportuan me urgjencë në spitalin Red Cross Hospital në Athinë, por pavarësisht përpjekjeve të mjekëve, të tre viktimat humbën jetën.

Shkaqet dhe rrethanat e aksidentit mbeten ende të paqarta. Policia greke ka nisur hetimet për të zbardhur dinamikën e përplasjes dhe për të përcaktuar përgjegjësitë.

Autoritetet po mbledhin të dhëna dhe prova nga vendi i ngjarjes, në përpjekje për të përcaktuar se si ndodhi përplasja fatale mes dy motorëve.