Një 30-vjeçar rus dyshohet se qëlloi për vdekje tre persona në Danilovgrad. Policia ka ngritur postblloqe dhe u ka kërkuar qytetarëve të qëndrojnë në banesa

MALI I ZI – Tre persona kanë mbetur të vrarë me armë zjarri në një poligon qitjeje në Danilovgrad, ndërsa policia malazeze ka ndërmarrë një operacion të gjerë për kapjen e autorit të dyshuar.

Sipas autoriteteve, në lidhje me ngjarjen është shpallur në kërkim një 30-vjeçar me shtetësi ruse, i cili dyshohet se është personi që ka qëlluar viktimat. Policia e konsideron atë të armatosur dhe u ka bërë thirrje qytetarëve të tregojnë kujdes.

Viktimat janë identifikuar si Petar Globareviç, 24 vjeç, Nemanja Kapor, 20 vjeç, të dy nga Podgorica, dhe Momir Radonjiç, 67 vjeç, nga Danilovgradi.

Menjëherë pas ngjarjes, forca të shumta policore janë angazhuar në kërkim të të dyshuarit. Në operacion marrin pjesë Njësia Speciale dhe njësi të tjera të Policisë së Malit të Zi, ndërsa janë ngritur pika kontrolli në disa zona.

Policia po kontrollon veçanërisht lëvizjet në aksin Danilovgrad–Podgoricë. Autoritetet po verifikojnë edhe mundësinë që i dyshuari të jetë larguar nga vendi i ngjarjes me një automjet tip “Seat Cordoba”, i cili, sipas raportimeve të mediave malazeze, është në pronësi të babait të njërit prej viktimave.

Për shkak të rrezikut të mundshëm, policia u ka kërkuar banorëve të shmangin daljet e panevojshme dhe të qëndrojnë në banesat e tyre deri në përfundimin e operacionit.

Qytetarët që mund të kenë informacion mbi vendndodhjen ose lëvizjet e të dyshuarit janë porositur të kontaktojnë menjëherë policinë në numrin 122, ndërsa u është bërë thirrje të mos tentojnë të afrohen apo ta përballojnë vetë personin e dyshuar.

Hetimet për zbardhjen e plotë të rrethanave të ngjarjes dhe motivit të mundshëm të vrasjeve vijojnë.