Guerreiro ishte ndër personat që dhanë informacione mbi aktivitetet e paligjshme të ish-zyrtarit të lartë të FBI-së

Allison Guerreiro, ish-partnerja 52-vjeçare e ish-zyrtarit të lartë të FBI-së, Charles McGonigal, është gjetur e vdekur në banesën e saj në Florida, raporton tabloidi britanik *Daily Mail*.

Sipas deklaratave të babait të saj, Guerreiro ka ndërruar jetë më 27 gusht. Ai ka deklaruar se vajza e tij nuk do të kryente vetëvrasje, duke ngritur pikëpyetje mbi rrethanat e vdekjes. Deri në publikimin e këtij informacioni, nuk janë bërë të ditura detaje të tjera zyrtare mbi shkakun e vdekjes.

Guerreiro kishte dhënë informacione lidhur me aktivitetet e McGonigal, të cilat më vonë u bënë pjesë e çështjeve penale ndaj ish-zyrtarit të FBI-së. Ajo kishte folur për marrëdhëniet e tij me persona të lidhur me interesat ruse, pagesa të padeklaruara dhe kontakte me zyrtarë shqiptarë.

Në deklarimet e saj, Guerreiro kishte përmendur edhe udhëtimet e McGonigal në Shqipëri dhe pretendonte se ai i kishte treguar për një takim me kryeministrin Edi Rama.

Charles McGonigal, ish-shef i kundërzbulimit të FBI-së në Nju-Jork, u përball me dy çështje të veçanta penale në Shtetet e Bashkuara.

Në dhjetor 2023, një gjykatë federale në Nju Jork e dënoi me 4 vjet e 2 muaj burgim dhe 40 mijë dollarë gjobë. McGonigal kishte pranuar fajësinë për akuzat që lidhen me marrëdhënien e tij me oligarkun rus Oleg Deripaska dhe shkeljen e sanksioneve amerikane.

Ndërsa në shkurt 2024, Gjykata Federale në Uashington e dënoi me 28 muaj burgim për marrjen e 225 mijë dollarëve nga ish-agjenti i inteligjencës shqiptare, Agron Neza, si dhe për fshehjen e kontakteve dhe takimeve të padeklaruara me persona të lidhur me Shqipërinë.

McGonigal ishte një prej zyrtarëve më të lartë të kundërzbulimit të FBI-së dhe çështja e tij u konsiderua një nga rastet më të rëndësishme të ndjekjes penale të një ish-zyrtari të lartë të këtij institucioni.