ZVICËR – Policia zvicerane ka arrestuar një 43-vjeçar, i dyshuar për të shtënat me armë që tronditën një festë rave në Aarau, ku humbi jetën 22-vjeçarja italiane Maria Spinelli dhe u plagosën pesë persona të tjerë.

Ngjarja e rëndë ndodhi rreth orës 02:30 të së dielës në hipodromin Schachen, ku po zhvillohej eventi “Aarau Rave”. Në aktivitet ndodheshin rreth 3,500 persona kur u dëgjuan të shtënat.

Spinelli, e cila jetonte në Zvicër, u godit nga plumbat dhe ndërroi jetë në vendngjarje si pasojë e plagëve të marra.

Sipas Policisë së kantonit Aargau, i dyshuari është ndaluar pak para orës 01:00 të së hënës dhe më pas është arrestuar nën dyshimin e fortë se ka kryer sulmin.

Hetuesit dyshojnë aktualisht se 43-vjeçari ka vepruar i vetëm. Megjithatë, mënyra se si janë kryer të shtënat mbetet një prej elementeve kryesore të hetimit.

Raportimet e mediave të huaja bëjnë me dije se të shtënat dyshohet se janë kryer nga dy pozicione të ndryshme dhe me dy armë të ndryshme: një pistoletë 9 mm dhe një pushkë sulmi.

Ky detaj ka ngritur fillimisht dyshime për praninë e më shumë se një personi në vendngjarje. Megjithatë, hetuesit po shqyrtojnë edhe mundësinë që të dyja armët të jenë përdorur nga i njëjti person.

Për autoritetet mbetet ende e paqartë se çfarë e ka motivuar sulmin dhe nëse viktima apo personat e tjerë të plagosur kanë qenë objektivi i drejtpërdrejtë i të shtënave.

Përveç 22-vjeçares, pesë persona të moshave 24 deri në 27 vjeç kanë mbetur të plagosur. Në mesin e tyre ndodheshin edhe dy shtetas italianë, Fabrizio Grande dhe Lorenzo Lombardo.

Të dy italianët kanë pësuar lëndime të lehta dhe, pas marrjes së ndihmës mjekësore, janë larguar nga spitali.

Pas arrestimit të 43-vjeçarit, autoritetet zvicerane po vijojnë punën për të rindërtuar dinamikën e sulmit, për të përcaktuar se si janë përdorur armët dhe për të zbardhur motivin.

Policia pritet të publikojë informacione të tjera ndërsa hetimi për ngjarjen vazhdon.