TIRANË — Brikena Selmani dhe Mateo Borri duket se kanë lënë pas ulje-ngritjet dhe krizat e muajve të fundit, duke shfaqur një marrëdhënie më të qetë dhe të konsoliduar. Së fundmi, çifti është shfaqur sërish bashkë në një ceremoni familjare, ku u martua djali i tezes së Brikenës, ndërsa Mateo ka marrë pjesë hapur si partneri i saj.

Prania e tij në një ngjarje kaq të rëndësishme familjare merr një peshë të veçantë po të kihet parasysh historia e tyre. Gjatë pjesëmarrjes në formatin Big Brother VIP Albania 5, dyshja zbuloi se njiheshin prej rreth katër vitesh, por në atë kohë lidhja e tyre nuk kishte mundur të avançonte për shkak të kundërshtimit dhe ndërhyrjes së familjarëve të Brikenës.

Megjithatë, dinamika ndryshoi rrënjësisht brenda shtëpisë së famshme, ku afrimiteti mes tyre u thellua dhe Mateo i kërkoi zyrtarisht të bëhej e dashura e tij, duke kurorëzuar ndjenjat edhe me një ceremoni simbolike martese brenda lojës. Pas përfundimit të reality show-t, çifti kaloi përmes disa momenteve të vështira dhe ndarjeve të aluduara në media, por shfaqjet e tyre të fundit dëshmojnë se ata e kanë gjetur sërish rrugën e bashkëpunimit, tashmë edhe me miratimin e familjes.