VLORË — Një ngjarje e rëndë ka tronditur ambientet e Komisariatit të Policisë Vlorë, ku një 32-vjeçar i arrestuar pak ditë më parë ka ndërruar jetë paraditen e sotme, pasi ka pësuar një arrest kardiak.

Sipas njoftimit zyrtar të policisë, ngjarja u konstatua rreth orës 09:50, kur shtetasi E. Sh., banues në Vlorë, u pikas në gjendje të rënduar shëndetësore brenda dhomave të shoqërimit. Stafi policor ka njoftuar menjëherë shërbimin mjekësor dhe 32-vjeçari është dërguar me urgjencë në Spitalin Rajonal të Vlorës. Megjithatë, pavarësisht ndërhyrjes së mjekëve, rreth orës 10:05 është konfirmuar zyrtarisht vdekja e tij, e cila paraprakisht dyshohet se ka ardhur si pasojë e një arresti kardiak.

Shtetasi E. Sh. ishte vënë në pranga në flagrancë vetëm dy ditë më parë, më 29 gusht 2026, rreth orës 23:00, nën akuzën e kryerjes së veprës penale të vjedhjes. Ndërkohë, nën drejtimin e Prokurorisë, grupi hetimor po vijon punën intensive për sqarimin e plotë të rrethanave të ngjarjes dhe dokumentimin ligjor të rastit.

“Vlorë/Informacion paraprak

Sot rreth orës 09:50, në ambientet e dhomave të shoqërimit të Komisariatit të Policisë Vlorë, është konstatuar në gjendje të rënduar shëndetësore shtetasi i arrestuar E. Sh., 32 vjeç, banues në Vlorë.

Menjëherë është njoftuar shërbimi mjekësor dhe 32-vjeçari është transportuar në Spitalin Rajonal Vlorë, ku, në orën 10:05, mjekët kanë konfirmuar se ky shtetas ka humbur jetën.

Paraprakisht dyshohet se 32-vjeçari ka ndërruar jetë si pasojë e arrestit kardiak.

Shtetasi E. Sh. ishte arrestuar në flagrancë më datë 29.08.2026, rreth orës 23:00, për veprën penale “Vjedhja”.

Nën drejtimin e Prokurorisë, vijon puna për sqarimin e plotë të rrethanave dhe dokumentimin ligjor të rastit”, njofton policia.