PEQIN — Uljan Shpataraku, ish-efektivi i policisë dhe shoferi i Ergys Agasit, është transferuar ditën e sotme në ambientet e paraburgimit të Peqinit, pasi Gjykata e Posaçme Kundër Korrupsionit dhe Krimit të Organizuar (GJKKO) i ka caktuar masën e sigurisë "arrest në burg". Mbi Shpatarakun rëndon akuza penale e përkrahjes së një anëtari të grupit kriminal.

Shpataraku u prangos së bashku me Ergys Agasin në zonën e Plepave në Durrës, pasi ky i fundit u lokalizua fillimisht në qytetin e Elbasanit. Ergys Agasi, i shumëkërkuar nga SPAK për abuzimet me tenderët e AKSHI-t, akuzohet se në bashkëpunim me Ermal Beqirajn — i arrestuar pak javë më parë në Francë — krijoi një grup të strukturuar kriminal për manipulimin e tenderëve publikë përmes korrupsionit, dhunës dhe pengmarrjes.

Në kuadër të së njëjtës dosje hetimore, ndërkohë që ish-drejtoreshës së AKSHI-t i është lehtësuar masa e sigurisë në "detyrim paraqitje", policia ka zhvilluar kontrolle blic me urdhër të SPAK-ut në banesën e Shpatarakut te "Liqeni i Thatë". Gjatë këtyre kontrolleve janë sekuestruar prova elektronike dhe dokumente të rëndësishme që lidhen drejtpërdrejt me hetimet për skandalin e tenderëve të AKSHI-t.