BRUKSEL — Duke nisur nga 1 shtatori, përdoruesit e skuterave elektrikë në Belgjikë do të duhet të mbajnë detyrimisht kokore mbrojtëse. Masa e re, e cila vlen për mjetet e projektuara për të arritur shpejtësi mbi 20 km/orë, u njoftua nga Ministria Federale e Mobilitetit në kuadër të shqetësimeve në rritje për sigurinë në rrugë.

Sipas rregullit të ri, autoritetet belge lejojnë përdorimin e një kokoreje për motorë të vegjël ose të një kokoreje biçiklete, me kusht që ajo të ofrojë mbrojtje edhe për tëmthat dhe pjesën e pasme të kokës. Të dhënat mjekësore dhe statistikat e aksidenteve tregojnë se dëmtimet në kokë dhe tru janë ndër pasojat më të shpeshta dhe më të rënda në fatkeqësitë me këto mjete, të cilat në rrugët publike të Belgjikës mund të qarkullojnë deri në 25 km/orë.

Përveç këtij detyrimi, në Bruksel është marrë vendimi për të shtyrë planin e ndalimit të skuterëve elektrikë të përbashkët, duke i lënë ata të qarkullojnë deri në fund të vitit. Belgjika kishte shtrënguar masat për këto mjete edhe në vitin 2022, kur vendosi ndalimin e qarkullimit në trotuare, kufizimin e moshës nën 16 vjeç, ndalimin e pasagjerëve dhe rregulla më të rrepta parkimi.