Një 100 mijë euro dyshohet se janë përfituar përmes një skeme mashtrimi në një pikë këmbimi valutor në Tiranë, ku autorët pretendohet se kanë përdorur identitetin e biznesmenit Bashkim Ulaj. Në kuadër të operacionit të koduar “Shuma”, policia ka arrestuar Agron Cenën, i dyshuar si i përfshirë në ngjarje.

Arrestimi i Cenës është kryer në Fushë-Krujë, ndërsa efektivët e strukturave të Krimit Ekonomik të Tiranës kanë ushtruar kontroll edhe në banesën e tij.

Gjatë kontrolleve, autoritetet kanë sekuestruar një automjet tip **Range Rover**, i cili dyshohet se ishte në përdorim të të arrestuarit.

Si u realizua mashtrimi

Ngjarja u denoncua nga një 70-vjeçar, pronar i një exchange-i, i cili dyshohet se u mashtrua nga persona që iu prezantuan si një i njohur i tij.

Sipas hetimeve, autorët përdorën edhe një video-thirrje, gjatë së cilës dyshohet se shfrytëzuan teknologjinë e inteligjencës artificiale për të manipuluar imazhin e personit në telefon. Në ekranin e 70-vjeçarit shfaqej fytyra e biznesmenit Bashkim Ulaj, me të cilin ai kishte njohje.

Gjatë komunikimit, personat i kërkuan kambistit shumën prej **100 mijë eurosh**, duke pretenduar se paratë do t’i ktheheshin brenda pak orësh.

Duke besuar se kërkesa vinte nga vetë biznesmeni, 70-vjeçari dorëzoi shumën te personi që u paraqit në subjekt për të marrë paratë.

Pas kalimit të afatit të premtuar, kambisti kontaktoi Bashkim Ulajn për kthimin e shumës. Sipas dëshmisë së tij, Ulaj mohoi të kishte kërkuar paratë apo të kishte dërguar ndonjë person për t’i tërhequr ato.

Pas kësaj, pronari i exchange-it bëri kallëzim në Policinë e Tiranës.

Hetimet dhe gjurmimi i autorëve

Specialistët e Krimit Ekonomik nisën verifikimin e pamjeve të kamerave të sigurisë dhe gjurmuan personin që kishte shkuar në exchange, si edhe automjetin me të cilin ai ishte larguar.

Sipas policisë, automjeti rezultoi i marrë me qira, një e dhënë që ndihmoi hetuesit në identifikimin dhe gjurmimin e personave të dyshuar.

Në kuadër të hetimeve janë arrestuar edhe **Brian Serica, 31 vjeç**, dhe **Skerdi Meta, 23 vjeç**, ndërsa **Rigels Hyseni, 31 vjeç**, është shpallur në kërkim.

Me arrestimin e Agron Cenës, hetimet vijojnë për dokumentimin e plotë të rolit të secilit prej personave të dyshuar dhe zbardhjen e plotë të skemës së mashtrimit.