Shqipëria vijon të ketë peshën më të lartë të sektorit të ndërtimit në ekonomi në Europë. Sipas të dhënave të Eurostat për vitin 2025, ndërtimi përbënte 12.6% të Prodhimit të Brendshëm Bruto, ndërsa mesatarja e Bashkimit Europian ishte vetëm 5%.

Kjo do të thotë se pesha e ndërtimit në ekonominë shqiptare ishte rreth 2.5 herë më e lartë se mesatarja e BE-së. Pas Shqipërisë renditet Rumania me 8.6%, ndërsa Kosova me 7.8% dhe Maqedonia e Veriut me 6.6%.

Në vendet e tjera të Ballkanit Perëndimor, ndërtimi zinte një pjesë dukshëm më të vogël të ekonomisë: 4.8% në Bosnjë-Hercegovinë, 4.6% në Serbi dhe 3.8% në Malin e Zi.

Brenda BE-së, pas Rumanisë, peshën më të lartë e kishin Sllovakia me 7.7%, Lituania me 6.7% dhe Kroacia me 6.6%. Në ekonomitë kryesore europiane, ndërtimi përbënte 5.1% të PBB-së në Itali, 5% në Francë dhe 4.5% në Gjermani.

Roli i lartë i ndërtimit është reflektuar edhe në rritjen ekonomike të Shqipërisë gjatë vitit 2025. Sipas të dhënave të INSTAT, sektori i ndërtimit kontribuoi me 0.54 pikë përqindje në rritjen ekonomike, ndërsa aktivitetet e pasurive të paluajtshme me 0.45 pikë përqindje.

Në të njëjtën kohë, bujqësia dhe industria vijuan të përballen me tkurrje. Bujqësia u reduktua me 2% gjatë vitit 2025, ndërsa industria me 1.6%, duke nxjerrë në pah kontrastin mes zgjerimit të ndërtimit dhe dobësimit të disa sektorëve të tjerë të ekonomisë.

Të dhënat tregojnë kështu një ekonomi ku ndërtimi dhe pasuritë e paluajtshme kanë marrë një peshë të jashtëzakonshme, ndërsa sektorë me rëndësi të madhe për punësimin, si bujqësia dhe industria, kanë shfaqur performancë më të dobët.