Kryeministri izraelit Benjamin Netanyahu ka kritikuar ashpër Bashkimin Evropian për qëndrimin ndaj planeve të Izraelit për ndërtimin e banesave në zonën E1 të Bregut Perëndimor, duke e akuzuar bllokun për standarde të dyfishta.

Në një postim në platformën X, Netanyahu përmendi situatën në Qipro, duke pretenduar se BE-ja hesht për praninë ushtarake turke në pjesën veriore të ishullit, ndërsa kritikon Izraelin për politikat e tij në territoret palestineze.

Netanyahu shprehu gjithashtu mbështetje për kryeministrin slloven Janez Janša, pasi Sllovenia bllokoi një deklaratë të përbashkët të vendeve anëtare të BE-së që dënonte planin izraelit për ndërtimin e më shumë se 1,200 banesave në zonën E1.

Sipas BE-së, projekti në fjalë rrezikon të ndajë Bregun Perëndimor dhe të pengojë krijimin e një shteti të qëndrueshëm palestinez. Brukseli e konsideron zgjerimin e vendbanimeve izraelite në territoret e pushtuara në kundërshtim me të drejtën ndërkombëtare.

Për shkak të kundërshtimit të Sllovenisë, deklarata nuk mori mbështetjen unanime të 27 vendeve anëtare dhe u publikua më pas nga Përfaqësuesja e Lartë e BE-së për Politikën e Jashtme, Kaja Kallas.

Vendimi i qeverisë sllovene ka shkaktuar përplasje edhe në politikën e brendshme të vendit. Presidentja Nataša Pirc Musar e ka kritikuar qëndrimin e qeverisë, ndërsa Janša ka mbrojtur vendimin, duke theksuar të drejtën e Sllovenisë për të përcaktuar politikën e saj të jashtme.