Athinë, 30 gusht 2026 – Një ngjarje e rëndë është zbuluar në Athinë, ku policia greke ka gjetur trupin e pajetë të një foshnjeje brenda një valixheje në një apartament të marrë me qira përmes Airbnb.

Sipas raportimeve të mediave greke, policia është njoftuar nga pronari i apartamentit, i cili kishte kërkuar ndërhyrje pasi personat që qëndronin në banesë refuzonin të largoheshin. Pronari kishte ngritur gjithashtu dyshime për konsum të lëndëve narkotike në ambientet e apartamentit.

Pas mbërritjes në banesë, efektivët gjetën disa persona, mes tyre një shtetas grek, vajzën e tij 15-vjeçare, një shtetas afgan, dy të mitur të tjerë dhe një grua me origjinë gjermane. Sipas autoriteteve, kjo e fundit kishte bërë më herët edhe një kallëzim në polici.

Gjatë kontrollit, efektivët morën dy valixhe nga apartamenti për t’i verifikuar në komisariat. Në njërën prej tyre u zbulua trupi i pajetë i një foshnjeje.

Nga hetimet paraprake, gruaja gjermane dyshohet se ka deklaruar se foshnja ishte fëmija i saj dhe se kishte ndërruar jetë rreth tetë muaj më parë.

Autoritetet greke po hetojnë shkaqet e vdekjes dhe rrethanat në të cilat trupi i foshnjës është mbajtur dhe transportuar gjatë kësaj periudhe. Për momentin, nuk janë bërë publike përfundime zyrtare mbi mënyrën apo shkakun e vdekjes.

Në kuadër të hetimit po verifikohet gjithashtu informacioni se 15-vjeçarja e pranishme në apartament mund të jetë shtatzënë. Autoritetet po shqyrtojnë edhe rrethanat që lidhen me shtatzëninë dhe personat e përfshirë.

Policia greke vijon hetimet për të zbardhur plotësisht ngjarjen, ndërsa çështja është referuar për ndjekje të mëtejshme nga autoritetet e drejtësisë.