Durrës, 30 gusht 2026 – Ndeshja mes Teutës dhe Tiranës, e vlefshme për javën e dytë të kampionatit “Abissnet Superiore”, është ndërprerë dy herë mbrëmjen e sotme në stadiumin “Niko Dovana”, për shkak të problemeve me sistemin e ndriçimit.

Shkëputjet e njëpasnjëshme të energjisë elektrike zhytën në errësirë fushën dhe tribunat, duke detyruar arbitrin të ndërpresë përkohësisht takimin.

Pas rikthimit të ndriçimit, loja rifilloi, por pas disa minutash u shënua një tjetër ndërprerje, duke sjellë sërish pezullimin e ndeshjes.

Gjatë momentit të errësirës, tifozët në stadium ndezën blicat e telefonave, duke krijuar një pamje të veçantë në tribuna. Në të njëjtën kohë, nga një pjesë e tifozëve u dëgjuan thirrje politike në kor, përfshirë sloganin “Rama ik!”.

Shkaqet e ndërprerjeve të ndriçimit nuk janë bërë ende të ditura. Incidenti rikthen vëmendjen te kushtet e infrastrukturës dhe standardet teknike të stadiumeve ku zhvillohen ndeshjet e elitës së futbollit shqiptar.