Një 22-vjeçare ka humbur jetën dhe pesë persona të tjerë janë plagosur pas të shtënave me armë zjarri gjatë natës në qytetin Aarau të Zvicrës.

Ngjarja ndodhi pranë pistës së garave me kuaj në zonën Schachen, ku ishte planifikuar të zhvillohej një aktivitet që do të vijonte deri në orët e para të mëngjesit të së dielës.

Sipas Policisë Kantonale të Aargaut, autori i dyshuar ende nuk është identifikuar dhe operacioni për gjetjen dhe kapjen e tij është në vijim. Deri tani, motivi i sulmit dhe rrethanat e sakta që çuan në të shtënat mbeten të paqarta.

Pas incidentit, policia rrethoi një zonë të gjerë që përfshinte pistën e garave, pishinën e qytetit dhe fushat sportive. Autoritetet u kanë bërë thirrje qytetarëve të shmangin zonën e bllokuar, ndërsa forca të shumta policore janë angazhuar edhe në pjesë të tjera të Aaraut si masë paraprake.

Policia u ka kërkuar dëshmitarëve të dorëzojnë fotografi dhe video të regjistruara gjatë ngjarjes, të cilat mund të ndihmojnë në identifikimin e autorit dhe në zbardhjen e rrethanave të sulmit.

Në operacion janë përfshirë, përveç forcave të policisë dhe shërbimeve zjarrfikëse, edhe njësia rajonale e reagimit ndaj katastrofave, KKE. Sipas transmetuesit zviceran SRF, gjatë orëve të para të mëngjesit është vërejtur gjithashtu një helikopter i ushtrisë zvicerane duke monitoruar zonën.

Hetimet vijojnë ndërsa autoritetet po përpiqen të përcaktojnë motivin e sulmit, rrethanat e plota të ngjarjes dhe nëse autori i dyshuar ka vepruar i vetëm.