LEZHË – Ritvan Pali është rikthyer në radhët e Policisë së Shtetit pas një shkëputjeje rreth nëntëmujore nga detyra. Ai është emëruar në pozicionin e Shefit të Operacionales në Drejtorinë Vendore të Policisë Lezhë.

Pali ka një përvojë të gjatë në strukturat e Policisë së Shtetit dhe formim juridik. Emërimi i tij në Lezhë vjen pas një periudhe të karakterizuar nga zhvillime të rëndësishme në karrierën e tij profesionale.

Më 4 prill 2025, në kohën kur drejtonte Komisariatin e Policisë Nr. 2 në Tiranë, Pali ishte në krye të operacionit për arrestimin e Altin Morinës, ish-efektiv i RENEA-s, i shpallur në kërkim nga SPAK.

Pas këtij operacioni, Pali u përball me masa disiplinore dhe ndryshime në detyrë. Ai e apeloi vendimin në Gjykatën Administrative, e cila, sipas të dhënave të bëra publike, vendosi në favor të tij duke shfuqizuar masën.

Pas vendimit gjyqësor, Pali zgjodhi të largohej përkohësisht nga strukturat e Policisë së Shtetit.

Tashmë, pas rreth nëntë muajsh, ai rikthehet në detyrë dhe merr drejtimin e Operacionales në Drejtorinë Vendore të Policisë Lezhë.

Rikthimi i tij në strukturat e Policisë së Shtetit vjen pas ndryshimeve në drejtimin e lartë të institucionit, me Skënder Hitën në krye të Policisë së Shtetit.