Një anije pasagjerësh me 267 persona në bord është përmbysur në det, rreth katër milje detare larg portit të Kyrenias, në Qipron e Veriut. Sipas të dhënave të deritanishme, të paktën gjashtë persona kanë humbur jetën.

Në bord ndodheshin 259 pasagjerë dhe tetë anëtarë të ekuipazhit. Sipas Ministrisë së Brendshme të Turqisë, anija kishte nisur të merrte ujë dhe ndodhej në rrezik të fundosjes, çka bëri që autoritetet të aktivizonin menjëherë një operacion të gjerë kërkim-shpëtimi.

Në zonën e ngjarjes janë angazhuar katër mjete të Rojës Bregdetare, ndërsa në operacion është përfshirë edhe anija e pasagjerëve Akgunler 3. Forcat e shpëtimit janë përforcuar më tej me pesë mjete të tjera detare dhe dy helikopterë.

Në operacionin e kërkim-shpëtimit janë angazhuar gjithashtu gjashtë mjete të Forcave Detare turke.

Kryetari i Kyrenias, Murat Şenkul, e ka cilësuar situatën si “shumë serioze”. Në një deklaratë të publikuar në Facebook, ai tha fillimisht se në bord mund të kishin qenë rreth 270 persona, ndërsa autoritetet turke kanë konfirmuar më pas shifrën prej 267 personash.

Sipas Şenkul, ekipet e sigurisë bregdetare po vijojnë operacionet e shpëtimit me mjete të vogla lundruese, në bashkëpunim me Akgunler Express.

Pamjet nga vendngjarja tregojnë pasagjerë duke u nxjerrë në breg pas përmbysjes së anijes. Në port janë parë gjithashtu një helikopter dhe ambulanca, ndërsa ekipet e emergjencave vijojnë operacionin.

Autoritetet po punojnë për shpëtimin e personave të tjerë në bord dhe për zbardhjen e plotë të shkaqeve të përmbysjes së anijes.