Një 37-vjeçar ka humbur jetën dhe pesë persona të tjerë janë helmuar nga monoksidi i karbonit në një kasolle malore në veri të Italisë.

Ngjarja ka ndodhur gjatë natës në zonën e Buscagna, në Luginën Devero, në territorin e komunës së Bacenos, në provincën Verbano-Cusio-Ossola, pranë kufirit me Zvicrën.

Në momentin e incidentit, në kasolle ndodheshin gjashtë barinj. Për shkaqe që ende nuk janë përcaktuar, monoksidi i karbonit është grumbulluar në ambientet e objektit, duke shkaktuar helmimin e tyre. Një prej barinjve, 37 vjeç, nuk ka mundur të mbijetojë.

Mes pesë personave të tjerë të prekur është edhe një 19-vjeçar, i cili ndodhet në gjendje kritike. Për shkak të rëndesës së gjendjes, ai është transportuar me helikopter drejt spitalit Niguarda në Milano, ku po merr trajtim të specializuar.

Dy persona të tjerë, të dy 62 vjeç, janë evakuuar me helikopter dhe janë dërguar në spitalin e Novarës. Sipas raportimeve, gjendja e tyre është klasifikuar si e verdhë.

Ndërhyrja e ekipeve të emergjencës është vështirësuar nga terreni i thepisur dhe aksesi i kufizuar në zonën malore, duke bërë të nevojshëm përdorimin e mjeteve ajrore për evakuimin e të dëmtuarve.

Autoritetet italiane kanë nisur hetimet për të përcaktuar shkakun e grumbullimit të monoksidit të karbonit në kasolle. Aktualisht po punohet për identifikimin e burimit të gazit dhe zbardhjen e plotë të rrethanave që çuan në tragjedi.