Blerja e një apartamenti për ta dhënë me qira mbetet një nga format më të zakonshme të investimit në tregun shqiptar të pasurive të paluajtshme. Megjithatë, të dhënat e fundit tregojnë se kthimi nga ky investim është relativisht modest dhe periudha për të rikuperuar shumën e investuar është e gjatë.

Edhe pse çmimet e qirave janë rritur gjatë viteve të fundit, në të njëjtën kohë janë rritur ndjeshëm edhe çmimet e shitjes së apartamenteve. Kjo ka bërë që raporti mes çmimit të pronës dhe të ardhurave nga qiraja të mbetet relativisht i dobët.

Një faktor që ka ndikuar në rritjen e të ardhurave nga qiradhënia është edhe turizmi, i cili ka shtuar kërkesën për apartamente me qira ditore, veçanërisht në Tiranë dhe në zona të tjera të kërkuara.

Sa fiton një apartament në Tiranë?

Sipas të dhënave të AirDNA, gjatë gjashtëmujorit të parë të vitit 2026, një pronë e listuar në Airbnb në Tiranë gjeneronte mesatarisht rreth 765 euro në muaj, ose rreth 9,180 euro në vit të ardhura bruto.

Nga ana tjetër, sipas indeksit Keydata Albania, çmimi mesatar i shitjes së banesave në Tiranë në mesin e vitit 2026 ka arritur në rreth 2,100 euro për metër katror.

Nëse marrim si shembull një apartament me sipërfaqe rreth 80 metra katrorë, vlera e blerjes do të shkonte në rreth 168 mijë euro.

Kjo shumë nuk përfshin shpenzimet për mobilimin dhe pajisjen e apartamentit, të cilat do të rrisnin më tej vlerën fillestare të investimit.

Kthimi bruto rreth 5.5%

Duke krahasuar të ardhurat vjetore prej rreth 9,180 eurosh me një investim prej 168 mijë eurosh, kthimi vjetor bruto rezulton rreth 5.5%.

Por kjo nuk është fitimi real që i mbetet investitorit.

Nga të ardhurat duhet të zbriten kostot e mirëmbajtjes së pronës, taksat dhe shpenzimet e tjera, si dhe kostot e mobilimit, amortizimi i ndërtesës dhe zëvendësimi periodik i pajisjeve dhe mobilieve.

Për këtë arsye, kthimi neto i investimit do të ishte ndjeshëm më i ulët se 5%.

Duhen të paktën 19 vite për të kthyer investimin

Nëse llogaritja bëhet vetëm mbi të ardhurat bruto nga qiraja, një apartament me vlerë rreth 168 mijë euro do të kërkonte të paktën 19 vite për të rikuperuar shumën e investuar.

Kjo periudhë është më e gjatë se standardi i konsideruar optimal në tregjet ndërkombëtare, ku kthimi i investimit përmes qiradhënies së një prone zakonisht synohet në një periudhë prej rreth 12 deri në 15 vitesh.

Kjo tregon se, pavarësisht rritjes së qirave dhe kërkesës së lartë për banesa, investimi në një apartament vetëm për qëllime qiradhënieje nuk ofron aktualisht një kthim veçanërisht të lartë në raport me çmimin e blerjes.

Obligacionet ofrojnë një kthim më të lartë

Një tjetër element që duhet marrë në konsideratë është krahasimi me instrumentet financiare.

Aktualisht, yield-i i obligacioneve 20-vjeçare të qeverisë shqiptare është rreth 6.5%, ndërsa ai i obligacioneve 15-vjeçare është rreth 6.22%, me tendencë në rritje.

Në këtë rast, kthimi bruto prej rreth 5.5% nga qiradhënia e një apartamenti është më i ulët se yield-i i këtyre instrumenteve financiare.

Pra, për një investitor që kërkon vetëm një burim të ardhurash periodike, blerja e një banese për ta dhënë me qira nuk rezulton domosdoshmërisht alternativa më tërheqëse.

Megjithatë, në rastin e pasurive të paluajtshme duhet marrë parasysh edhe rritja potenciale e vlerës së pronës me kalimin e viteve, e cila mund të ndikojë në kthimin total të investimit.

Në përfundim, shifrat tregojnë se tregu shqiptar i banesave ofron aktualisht një kthim relativisht modest nga qiradhënia, ndërsa çmimet e larta të pronave bëjnë që investitori të presë për shumë vite për të rikuperuar kapitalin e vendosur.