TIRANË – Është mbyllur pas disa orësh protesta e 91-të e rezistencës qytetare në Tiranë, e zhvilluar këtë të shtunë përpara Kryeministrisë dhe në rrugët e kryeqytetit.

Tubimi nisi me mbledhjen e qytetarëve përpara godinës së qeverisë, ku gjatë fjalimeve u artikuluan kritika dhe akuza ndaj qeverisë. Kërkesa kryesore e protestuesve vijoi të ishte dorëheqja e kryeministrit Edi Rama.

Gjatë protestës u shfaqën pankarta me mesazhe kundër qeverisë, ndërsa pjesëmarrësit deklaruan se nuk kanë ndërmend të tërhiqen nga aksioni i tyre qytetar.

“Koha nuk na lodh, na forcon” ishte një prej mesazheve të përcjella gjatë tubimit. Një tjetër protestues, duke iu referuar kryeministrit, deklaroi se “Rama numëron ditët që i kanë ngelur”.

Në protestë u dëgjuan gjithashtu kërkesa që lidhen me problematikat sociale. Një prej pensionistëve pjesëmarrës kërkoi dorëheqjen e kryeministrit dhe më shumë mbështetje për pensionistët dhe personat me aftësi të kufizuara.

Në fjalimet e mbrëmjes u përmend edhe diaspora, me thirrje për bashkimin e grupeve të ndryshme shoqërore dhe profesionale dhe për një pjesëmarrje më të gjerë në protestat e ardhshme.

Pas përfundimit të fjalimeve, qytetarët marshuan në disa prej rrugëve të Tiranës, duke vijuar me thirrjet kundër qeverisë.

Me protestën e sotme, aksioni qytetar shënon 91 ditë radhazi, ndërsa pjesëmarrësit kanë paralajmëruar rikthimin në shesh dhe vijimin e protestave në ditët në vazhdim.