MOGADISHU – Një operacion i përbashkët i Marinës Turke dhe Ushtrisë Kombëtare Somaleze ka përfunduar me çlirimin e anijes së mallrave “MV LATUF”, e cila ishte marrë nën kontroll nga piratët më 17 gusht në brigjet e Puntlandit.

Operacioni zgjati rreth 10 ditë dhe u shoqërua me një përballje të ashpër me grupet pirate. Gjatë aksionit ushtarak, forcat e përfshira kanë shkatërruar katër mjete lundruese që dyshohet se përdoreshin nga sulmuesit, ndërsa 14 piratë janë vrarë.

Pas presionit të vazhdueshëm nga forcat ushtarake, personat e armatosur që kishin marrë kontrollin e anijes u detyruan ta braktisnin atë, duke i dhënë fund pengmarrjes.

“MV LATUF”, që lundron me flamurin e Kamerunit, ishte nisur nga Turqia në fund të korrikut me destinacion Tanzaninë. Në momentin e sekuestrimit, në bord ndodheshin të paktën tetë anëtarë ekuipazhi.

Pas lirimit, anija ka vijuar udhëtimin nën monitorimin e forcave turke, ndërsa autoritetet kanë garantuar sigurinë e ekuipazhit.

Në mediat ndërkombëtare është raportuar se anija mund të ketë pasur armë turke në ngarkesë, por ky informacion nuk është konfirmuar zyrtarisht nga autoritetet somaleze. Ministria e Mbrojtjes në Mogadishu nuk ka dhënë detaje lidhur me përmbajtjen e ngarkesës.

Operacioni zhvillohet në një periudhë kur pirateria në brigjet e Somalisë dhe në zonën e Bririt të Afrikës po shfaq sërish shenja të rritjes. Sipas të dhënave të Organizatës Ndërkombëtare Detare (IMO), që nga fillimi i vitit janë regjistruar të paktën 15 sulme, niveli më i lartë që prej vitit 2013.

Ndërkohë, raportohet se të paktën pesë anije të tjera vijojnë të jenë nën kontrollin e piratëve somalezë në rajon.