TIRANË – Laçi ka marrë fitoren e parë në kampionat, duke mposhtur 2-1 Partizanin në transfertë, ndërsa Elbasani dhe Vllaznia kanë ndarë nga një pikë në barazimin 1-1. Dy sfidat hapën javën e dytë të Kategorisë Superiore.

Bibo i jep fitoren Laçit

Kurbinasit festuan ndaj Partizanit falë një performance vendimtare të Stiven Bibos, i cili realizoi të dy golat e Laçit.

Sulmuesi zhbllokoi takimin që në minutën e 8-të, me një goditje të fuqishme nga jashtë zonës që përfundoi në rrjetën e mbrojtur nga Qirko.

Partizani e pati të vështirë të reagonte, ndërsa situata u komplikua edhe më shumë në fundin e pjesës së parë. Marku u ndëshkua me karton të kuq në minutat shtesë, duke lënë të kuqtë me një lojtar më pak.

Laçi shfrytëzoi epërsinë numerike dhe në minutën e 75-të Bibo shënoi sërish, duke çuar shifrat në 2-0.

Partizani arriti të ngushtojë diferencën në fund me anë të Aliut, por goli nuk mjaftoi për të ndryshuar fatin e takimit.

Me këtë sukses, Laçi ngjitet në kuotën e 4 pikëve, ndërsa Partizani mbetet me vetëm 1 pikë pas dy javëve të para.

Elbasani dhe Vllaznia, barazim me dramë në fund

Në sfidën tjetër, Elbasani dhe Vllaznia u ndalën në barazimin 1-1 në një përballje që pati zhvillime të forta në minutat e fundit.

Vllaznia kaloi në avantazh në minutën e 18-të me Muratajn, ndërsa vendasit gjetën baraspeshën në minutën e 75-të, kur Hebaj riktheu ekuilibrin në rezultat.

Shkodranët patën mundësinë të merrnin sërish avantazhin në kohën shtesë, por dy golat e shënuar u anuluan për pozicion jashtë loje.

Në rastin e parë, goli i Tafilit u anulua pasi Perez ishte në pozicion të parregullt dhe ndikoi në pamjen e portierit. Pak më vonë, edhe goli i Mustës nuk u quajt i vlefshëm për shkak të pozicionit jashtë loje.

Elbasani dhe Vllaznia regjistrojnë kështu barazimin e dytë radhazi në kampionat, pas rezultateve të njëjta në javën hapëse.