VAU I DEJËS – Një incident i rëndë me energjinë elektrike ka përfunduar me një viktimë dhe një person të plagosur rëndë në Vaun e Dejës.

Ngjarja ka ndodhur pasi dy persona, një 40-vjeçar që punonte si roje në një lokal dhe një 46-vjeçar me profesion elektricist, kanë rënë në kontakt me energjinë elektrike.

Sipas njoftimit paraprak të policisë, 40-vjeçari S. P. ka humbur jetën gjatë transportimit drejt spitalit, ndërsa 46-vjeçari D. D. ndodhet në gjendje të rëndë shëndetësore.

Dyshohet se incidenti ka ndodhur në ambientet e lokalit në pronësi të shtetasit Gj. S., ndërsa rrethanat e sakta të ngjarjes mbeten ende për t’u përcaktuar.

Në vendngjarje kanë mbërritur shërbimet e policisë dhe grupi hetimor, ndërsa nën drejtimin e Prokurorisë kanë nisur hetimet për të zbardhur dinamikën e incidentit dhe për të përcaktuar shkaqet që çuan në kontaktin fatal me energjinë elektrike.

Njoftimi i Policisë:

"Sipas informacionit paraprak, shtetasi S. P., 40 vjeç, i cili punonte si roje i lokalit në pronësi të shtetasit Gj. S., dhe D. D., 46 vjeç, me profesion elektricist, kanë rënë në kontakt me energjinë elektrike.

Si pasojë e incidentit, 40-vjeçari S. P. ka humbur jetën gjatë transportimit për në spital, ndërsa 46-vjeçari D. D. ndodhet në gjendje të rëndë shëndetësore. Grupi hetimor, nën drejtimin e Prokurorisë, ka nisur punën për sqarimin e plotë të rrethanave të ngjarjes dhe përcaktimin e shkaqeve që çuan në incidentin tragjik.", njoftoi Policia.