MOSKË – Presidenti rus Vladimir Putin u ka sugjeruar mësuesve në Rusi që t’u shpjegojnë nxënësve arsyetimin e Kremlinit për luftën në Ukrainë përmes një analogjie nga bota e egër.

Sugjerimi u bë gjatë një takimi me mësuesit, në kuadër të aktiviteteve për Ditën e Diturisë dhe nisjen e vitit të ri shkollor.

Gjatë diskutimit, mësuesi Dmitry Balanchukov, nga rajoni i Belgorodit, foli për një udhëtim që kishte zhvilluar në Polin e Veriut. Putin e pyeti nëse kishte parë arinj polarë dhe më pas e orientoi bisedën drejt marrëdhënieve mes kafshëve në ekosistem.

Sipas presidentit rus, balenat vrasëse sulmojnë arinjtë polarë në grup, duke i krahasuar këto marrëdhënie me një “zinxhir ushqimor”.

Putin argumentoi se këto procese mund t’u shpjegohen fëmijëve në mënyrë që ata të kuptojnë “se në çfarë lloj bote jetojmë” dhe, sipas tij, të kuptojnë edhe arsyet pse Rusia po zhvillon atë që Kremlini e quan “operacion special ushtarak” në Ukrainë.

Deklaratat vijnë në kuadër të përpjekjeve të vazhdueshme të autoriteteve ruse për ta paraqitur luftën në Ukrainë përmes narrativës zyrtare të Kremlinit edhe në sistemin arsimor.