TIRANË – 29 gusht 2026 – Kryeministria ka reaguar pas vendimit të Erion Veliajt për t’i hequr kompetencat e deleguara nënkryetares së Bashkisë së Tiranës, Anuela Ristani.

Përmes zëdhënëses Manjola Hasa, në një reagim për Top Channel, Kryeministria ka theksuar se Erion Veliaj vijon të jetë kryetar i Bashkisë së Tiranës, duke iu referuar vendimit të Gjykatës Kushtetuese.

Në reagim argumentohet se ushtrimi i mandatit nga Veliaj nuk përbën vetëm një të drejtë të tij si i zgjedhur, por edhe një të drejtë të qytetarëve të Tiranës që e kanë votuar. Kryeministria e konsideron këtë një çështje të respektimit të Kushtetutës dhe vullnetit të zgjedhësve.

Sa i përket situatës së krijuar në Bashkinë e Tiranës, Kryeministria e lidh atë me faktin që Veliaj ndodhet në qeli dhe shprehet se kjo ka sjellë një situatë të pazakontë në drejtimin e kryeqytetit.

Më poshtë reagimi i plotë i Kryeministrisë:

“Për këtë çështje ka folur Gjykata Kushtetuese dhe vendimi i saj është i qartë: Erion Veliaj është kryetar i Bashkisë së Tiranës dhe ushtrimi i mandatit nga ana e vet, nuk është një e drejtë thjesht e tij si i zgjedhur, po është një e drejtë e zgjedhësve të kryeqytetit, e cila cënohet përditë me pasoja jo të papërfillshme në mbarëvajtjen e punëve dhe shërbimeve të Bashkisë Tiranë.

Ky është opinioni i kryeministrit dhe kjo është një çështje e respektimit të Kushtetutës e të vullnetit të zgjedhësve, tek e cila kryeministri nuk sheh hapësirë për interpretime nga askush.

Sa për “situatën e krijuar” në Bashkinë e Tiranës, ajo është pjesë e konfuzionit që ka krijuar në ecurinë e kryeqytetit të Shqipërisë kyçja e të zgjedhurit në qeli, e cila ka imponuar një qeverisje të Tiranës me vartës në distancë – një absurd “ligjor” që në Europën demokratike as nuk mund të imagjinohet, e jo më të ndodhë.”