FUSHË-ARRËZ – 29 gusht 2026 – Dy persona janë arrestuar nga Policia në Fushë-Arrëz, pasi dyshohen se kanë kultivuar 355 bimë narkotike në fshatin Apripë e Gurit.

Në pranga kanë rënë E. P., 20 vjeç, dhe S. J., 50 vjeç, të dy banues në këtë fshat. Operacioni u zhvillua nga shërbimet e Komisariatit të Policisë Pukë, në drejtimin e Prokurorisë dhe në bashkëpunim me Forcat Operacionale.

Sipas Policisë, arrestimet janë kryer në kuadër të operacionit të koduar “Gurra”, pas një hetimi disa-javor të zhvilluar me metoda proaktive, me qëllim goditjen e veprimtarisë së paligjshme të kultivimit të bimëve narkotike.

Nga hetimet dyshohet se dy të arrestuarit kishin kultivuar në një sipërfaqe toke publike në fshatin Apripë e Gurit 355 bimë të dyshuara narkotike Cannabis Sativa.

Bimët narkotike u sekuestruan dhe më pas u asgjësuan nga Policia përmes djegies.

Materialet procedurale i janë referuar Prokurorisë për veprime të mëtejshme, ndërsa vijojnë hetimet për dokumentimin e plotë të veprimtarisë së dyshuar kriminale.