TIRANË – Gjykata e Posaçme kundër Korrupsionit dhe Krimit të Organizuar (GJKKO) ka caktuar masën e sigurisë “Arrest me burg” ndaj ish-efektivit të Policisë, Uljan Shpataraku.

Shpataraku u arrestua më 26 gusht në Durrës, teksa ndodhej në të njëjtin automjet me Ergys Agasin, i cili ishte shpallur në kërkim nga drejtësia. Ish-efektivi akuzohet për veprën penale të “përkrahjes së autorit të krimit”.

Në momentin e arrestimit, Shpataraku drejtonte automjetin e tij tip “Audi RS2”, me vlerë të pretenduar rreth 100 mijë euro. Automjeti është sekuestruar nga autoritetet.

Në seancën për caktimin e masës së sigurisë, Shpataraku është mbrojtur nga avokati Elton Hyseni, ndërsa Prokuroria e Posaçme është përfaqësuar nga prokurori Bledar Maksuti.

Gjatë kontrolleve në banesën e ish-zyrtarit të Policisë, autoritetet kanë gjetur dhe sekuestruar shtatë armë zjarri: tre pistoleta, dy armë të tipit “shotgun” dhe dy pushkë.

Shpataraku ka mbajtur më herët detyra në strukturat e Policisë së Shtetit, ndërsa hetimet ndaj tij vijojnë në kuadër të procedimit penal të Prokurorisë së Posaçme.