MORINË – Fluksi i udhëtarëve vijon të jetë i lartë në Pikën e Kalimit Kufitar të Morinës, në ditët e fundit të gushtit, me mijëra qytetarë që po hyjnë në Shqipëri për të kaluar ditët e fundit të verës në bregdet.

Vetëm gjatë 24 orëve të fundit, përmes Morinës kanë hyrë në Shqipëri 52 mijë e 864 shtetas dhe 13 mijë e 531 automjete. Në të njëjtën periudhë, nga vendi kanë dalë 35 mijë e 72 shtetas dhe 11 mijë e 238 automjete.

Fluksi i lartë konfirmohet edhe nga bilanci i pesë ditëve të fundit. Nga 24 deri më 28 gusht, nëpërmjet kësaj pike kufitare kanë hyrë në Shqipëri 152 mijë e 694 shtetas dhe 46 mijë e 870 automjete.

Ndërkohë, në dalje gjatë së njëjtës periudhë janë regjistruar 121 mijë e 846 shtetas dhe 37 mijë e 148 automjete.

Shumë prej udhëtarëve, kryesisht nga Kosova, po shfrytëzojnë ditët e fundit të verës dhe temperaturat e favorshme për të pushuar në bregdetin shqiptar. Për një pjesë të tyre, kjo është vizita e dytë ose e tretë në Shqipëri gjatë këtij sezoni.

Morina vijon të jetë një nga pikat kryesore të lëvizjes mes Kosovës dhe Shqipërisë, ndërsa autoritetet po vijojnë menaxhimin e fluksit me synim shmangien e radhëve dhe përshpejtimin e procedurave kufitare.