DIBËR – Vatrat e zjarrit në qarkun e Dibrës vijojnë të paraqesin situatë problematike, veçanërisht në bjeshkën e fshatit Sllatinë, ku flakët kanë përfshirë një sipërfaqe të konsiderueshme me pisha dhe dëllinja.

Era e fortë dhe temperaturat e larta kanë favorizuar përhapjen e zjarrit, ndërsa forcat zjarrfikëse ndodhen në terren dhe po punojnë për izolimin e vatrave.

Në operacionin për shuarjen e flakëve janë angazhuar efektivë të shërbimit zjarrfikës të Bashkisë Dibër, si dhe banorë të zonës.

Situata mbetet problematike edhe në afërsi të Selishtës dhe Qafë-Helmës, ndërsa një vatër zjarri vijon të jetë aktive edhe në Vajkal të Bulqizës.

Në Vajkal, prej dy ditësh, operacioni për shuarjen e zjarrit po mbështetet edhe nga ajri me helikopterë, me qëllim frenimin e përhapjes së flakëve në drejtim të zonave të banuara.

Forcat në terren vijojnë punën për izolimin e vatrave dhe mbrojtjen e banesave dhe zonave të banuara.