DURRËS – Kapiteneria e Portit të Durrësit ka ndaluar hyrjen në radën e portit të tanker-it “Hanuman”, një anije e listuar nga Inteligjenca e Mbrojtjes së Ukrainës (GUR) si pjesë e të ashtuquajturës “flotë hije” ruse.

Anija, e cila lundron nën flamurin e Sierra Leones, nuk është lejuar të hyjë në port më 28 gusht.

Bëhet fjalë për tanker-in me numër IMO 9295048, i cili, sipas të dhënave të publikuara nga GUR, është përfshirë në transportin detar të naftës ruse dhe produkteve të saj, në kundërshtim me sanksionet dhe kufirin e çmimit të vendosur nga vendet e G7 dhe Bashkimi Europian.

Sipas databazës së shërbimit ukrainas, në shtator të vitit 2025, “Hanuman” ka transportuar më shumë se 30 mijë tonë produkte nafte ruse nga porti i Novorossiysk, në Rusi, drejt Turqisë.

Anija është evidentuar gjithashtu për raste të fikjes së sistemit të identifikimit automatik (AIS). Në të dhënat e publikuara nga GUR përfshihen edhe vizita të “Hanuman” në porte ruse, si dhe lëvizje të tjera, mes tyre edhe në Durrës.

Vendimi i Kapitenerisë së Durrësit për të mos lejuar hyrjen e tanker-it në radën e portit vjen në një kohë kur aktiviteti i anijeve të dyshuara se janë pjesë e “flotës hije” dhe që lidhen me transportin e naftës ruse po monitorohet nga autoritetet ndërkombëtare.

Termi “flotë hije” përdoret për një rrjet anijesh që dyshohet se shërben për transportin e naftës dhe produkteve të tjera ruse, duke synuar shmangien e kufizimeve dhe sanksioneve të vendosura pas nisjes së luftës në Ukrainë.

Rasti i tanker-it “Hanuman” e vendos Portin e Durrësit në vëmendje, pasi anija figuron në të dhënat e GUR për aktivitetet dhe itineraret e saj të mëparshme. Vendimi i Kapitenerisë ka bërë që ajo të mos lejohet të hyjë në port më 28 gusht.