TIRANË – Dy punonjës policie kanë mbetur të lënduar pas një aksidenti të ndodhur në Kamëz, ku automjeti i Policisë është përplasur me një makinë tjetër.

Sipas Drejtorisë Vendore të Policisë Tiranë, automjeti i policisë ishte duke patrulluar në territorin ku ishte planifikuar me shërbim, kur u godit nga një automjet që drejtohej nga një 26-vjeçar.

Ngjarja ka ndodhur teksa i riu po lëvizte nga qendra e Kamzës në drejtim të rrugës “Berisha”. Nga të dhënat paraprake, ai dyshohet se ka humbur kontrollin mbi drejtimin e automjetit dhe më pas është përplasur me makinën e Policisë.

Si pasojë e aksidentit, dy efektivët kanë mbetur të lënduar dhe janë dërguar në spital, ku po marrin trajtim mjekësor. Sipas Policisë, ata ndodhen jashtë rrezikut për jetën.

26-vjeçari nuk ka pësuar dëmtime dhe është shoqëruar në ambientet e komisariatit, ku po kryhen veprimet procedurale për dokumentimin e ngjarjes dhe sqarimin e plotë të rrethanave të aksidentit.

Policia ka hedhur poshtë gjithashtu raportimet se përplasja ka ndodhur gjatë një ndjekjeje policore, duke sqaruar se automjeti i shërbimit ishte në patrullim në zonën e përcaktuar.

Reagimi i Drejtorisë Vendore të Policisë Tiranë:

"Automjeti i Policisë, i cili ishte duke patrulluar në territorin ku ishte planifikuar me shërbim, është goditur nga një automjet me drejtues shtetasin R. T., 26 vjeç, i cili, teksa lëvizte nga qendra e Kamzës në drejtim të rrugës “Berisha”, dyshohet se ka humbur kontrollin mbi drejtimin e automjetit.

Si pasojë e përplasjes, janë dëmtuar 2 punonjës policie, të cilët po marrin trajtim mjekësor në spital, jashtë rrezikut për jetën.

26-vjeçari nuk ka pësuar dëmtime dhe është shoqëruar në ambientet e Komisariatit të Policisë, ku po kryhen veprimet procedurale për dokumentimin dhe sqarimin e plotë të rrethanave të aksidentit."