Kina ka arritur përparime fazor në mbështetjen e komunikimit emergjent dhe rikthimin e infrastrukturës pasi një rrëshqitje dheu goditi një pikë kalimi kufitar në Rajonin Autonom të Xizang-ut në jugperëndim të Kinës, bëri të ditur të enjten Ministria e Industrisë dhe e Teknologjisë së Informacionit.

Deri më tani, një stacion bazë telekomunikacioni është rikthyer me sukses në funksionim, dy stacione të reja bazë janë vënë në punë dhe roamingu ndër-rrjetor 5G është aktivizuar njëkohësisht, tha ministria.

Rrëshqitja e dheut goditi pikën e kalimit kufitar Gyirong në kontenë me të njëjtin emër në Rajonin Autonom të Xizang-ut të mërkurën në mëngjes. Deri në orën 8:00 të së enjtes, tre veta kishin humbur jetën, 558 të tjerë ishin ende të zhdukur, ndërsa dy banorë ishin shpëtuar.

Rrëshqitja e dheut ka ndërprerë rrugët që të çojnë në pikën kufitare nga ana kineze, si edhe komunikimin dhe furnizimin me energji elektrike.

Operatorët vendorë të telekomunikacionit kanë mobilizuar ekipe dhe pajisje emergjente për kontrollin e linjave, rregullimin e defekteve dhe optimizimin e rrjetit, për të siguruar komunikimin për operacionet e shpëtimit dhe për njerëzit e prekur.

Autoritetet kineze kanë nisur operacione shpëtimi në shkallë të plotë pas rrëshqitjes së dheut. Komisioni Kombëtar i Shëndetësisë (NHC) njoftoi të enjten se dërgoi zyrtarë të lartë në Xizang për të udhëhequr shpëtimin mjekësor dhe përpjekjet e reagimit emergjent.

Në deklaratën e vet NHC-ja thotë që, në bashkëpunim me qeverinë rajonale të Xizang-ut, po bashkërendon dhe po dërgon burime mjekësore për të siguruar që të zbatohen të gjitha masat e nevojshme.

Profesionistë mjekësorë dhe të kontrollit të sëmundjeve janë dërguar nga Lhasa në zonën e goditur nga fatkeqësia me furnizime emergjente mjekësore, dezinfektues dhe ilaçe për kontrollin e sëmundjeve, si edhe mjete të specializuara, ndërsa janë mobilizuar gjithashtu ambulanca, personel mjekësor dhe punonjës të mbështetjes psikologjike nga kontetë fqinje.