BRITANI E MADHE, 27 gusht 2026 — Një sulm i gjerë kibernetik ka prekur tre aeroporte të rëndësishme në Britaninë e Madhe, duke komprometuar të dhënat personale të rreth 8.7 milionë klientëve.

Incidenti ka prekur aeroportet Manchester, London Stansted dhe East Midlands, të cilat administrohen nga Manchester Airports Group (MAG).

Sipas kompanisë, një palë e tretë e paautorizuar ka arritur të sigurojë akses në të dhëna të klientëve të lidhura me disa prej shërbimeve të aeroporteve.

Mes të dhënave të komprometuara janë adresat e emailit, numrat e telefonit, numrat e regjistrimit të automjeteve dhe kodet postare.

Informacionet lidhen me shërbime të ndryshme, përfshirë rezervimet e parkimit, sallonet VIP, shërbimin Fast Track dhe regjistrimet në rrjetet Wi-Fi të terminaleve.

Fluturimet nuk janë prekur

MAG ka deklaruar se sulmi nuk ka ndikuar në operacionet e fluturimeve dhe as në funksionimin normal të aeroporteve.

Sipas kompanisë, siguria e pasagjerëve dhe operacionet ajrore nuk janë komprometuar, ndërsa të dhënat bankare dhe informacionet e pagesave nuk janë prekur nga incidenti.

Sulmi dyshohet se ka ndodhur gjatë fundjavës, ndërsa drejtuesit e grupit janë informuar për incidentin të martën. Pas konstatimit të ndërhyrjes, kompania ka ndërmarrë masa për kufizimin e dëmit dhe ka angazhuar specialistë të sigurisë kibernetike.

Deri tani nuk është bërë i ditur identiteti i autorëve. MAG e ka përshkruar personin ose grupin përgjegjës si një “palë të tretë të paautorizuar”.

Hetimet vijojnë për të përcaktuar mënyrën e depërtimit në sistemet e aeroportit, shtrirjen e plotë të incidentit dhe personat përgjegjës për sulmin.