LEZHË, 27 gusht 2026 — Një aksident tragjik është regjistruar mbrëmjen e sotme në aksin rrugor që lidh Fishtën me superstradën Lezhë–Shkodër, ku ka humbur jetën një 13-vjeçar.

Sipas të dhënave paraprake, i mituri po lëvizte me patinë në momentin kur është përplasur nga një automjet tip “Audi”.

Në automjet ndodhej një çift bashkëshortësh nga Elbasani, të cilët udhëtonin së bashku me fëmijën e tyre të mitur. Pas përplasjes me 13-vjeçarin, drejtuesi i “Audit” ka humbur kontrollin mbi mjetin, i cili ka dalë nga rruga dhe ka përfunduar në kanal.

Çifti dhe fëmija i tyre kanë mundur të shpëtojnë nga aksidenti, pavarësisht se automjeti përfundoi në kanal.

Ndërkohë, 13-vjeçari është transportuar me urgjencë drejt spitalit, por, për shkak të plagëve të marra nga përplasja, ka humbur jetën gjatë rrugës.

Në vendngjarje kanë mbërritur shërbimet e Policisë dhe grupi hetimor, të cilët kanë nisur hetimet për të përcaktuar dinamikën e aksidentit dhe shkaqet që çuan në përplasjen fatale.

Drejtuesi i automjetit është shoqëruar nga Policia, ndërsa vijojnë veprimet hetimore për dokumentimin e plotë të ngjarjes tragjike.

Lezhë/Informacion paraprak

Rreth orës 20:10, në aksin e vjetër rrugor Blinisht–Fishtë, në fshatin Fishtë, automjeti me drejtues shtetasin E. K., rreth 33 vjeç, ka aksidentuar një të mitur, rreth 13 vjeç, i cili lëvizte me monopatinë. Si pasojë e përplasjes, i mituri ka ndërruar jetë.

Shtetasi E. K. është shoqëruar në Komisariat për kryerjen e veprimeve të mëtejshme procedurale.

Grupi hetimor ndodhet në vendngjarje dhe po punon për dokumentimin e plotë të ngjarjes dhe zbardhjen e rrethanave të aksidentit.