LEFKADË, GREQI, 27 gusht 2026 — Policia greke ka arrestuar tetë persona të dyshuar për përfshirjen në një atentat me eksploziv ndaj një biznesmeni greko-amerikan në ishullin e Lefkadës.

Ngjarja dyshohet se ka ndodhur në janar 2026, kur autorët vendosën një pajisje shpërthyese në vilën e biznesmenit, në zonën pranë Agiofyllit. Pajisja, e cila përmbante rreth 10 kilogramë dinamit xhelatinë, fatmirësisht nuk shpërtheu.

Mes të arrestuarve është edhe shqiptari Mikel Selimaj, 46 vjeç, nga Vlora, i cili, sipas hetuesve grekë, dyshohet se ka qenë një nga organizatorët e sulmit.

Sipas dosjes hetimore, Selimaj dhe shtetasi grek Evstratios Nousis, 31 vjeç, të dy të burgosur në burgun e Malandrinos, dyshohet se kanë dhënë udhëzimet për realizimin e atentatit, duke përdorur persona të tjerë jashtë ambienteve të burgut.

Pajisja shpërthyese u gjet në vilë

Sipas autoriteteve greke, gjashtë bashkëpunëtorët e dy të burgosurve dyshohet se vendosën eksplozivin në ballkonin e pasmë të vilës.

Pajisja ishte e pajisur me një fitil me djegie të ngadaltë, por u zbulua nga kujdestari i banesës përpara se të aktivizohej. Zbulimi i saj parandaloi një shpërthim dhe pasojat që mund të kishte shkaktuar.

Gjashtë personat e arrestuar jashtë burgut dyshohen për formim të një bande, si dhe për shkelje të legjislacionit grek për armët dhe eksplozivët.

Dy organizatorët ndodhen në burg

Mikel Selimaj ndodhet në paraburgim që prej majit 2025, pasi akuzohet për vrasjen me armë zjarri të 41-vjeçarit Altin Arapaj në Rafina. Sipas autoriteteve greke, ai ka precedentë penalë edhe për vepra të lidhura me drogën, vjedhjet dhe grabitjet.

Ndërkohë, edhe Evstratios Nousis ndodhet i arrestuar për çështje të tjera penale. Në janar të këtij viti, ai dyshohet se ka plagosur brenda burgut një 46-vjeçar nga Gjirokastra, Dhimo Meci, i cili akuzohet për vrasje me pagesë.

Hetuesit grekë po analizojnë gjithashtu një tjetër incident që dyshohet se lidhet me biznesmenin. Në maj, ai u bë objekt i një sulmi me armë në Voula, ndërsa autorët e këtij sulmi ende nuk janë identifikuar.

Motivi i atentatit me eksploziv mbetet ende i paqartë. Autoritetet greke po vijojnë hetimet për të përcaktuar rolin konkret të secilit prej tetë të arrestuarve dhe për të zbuluar nëse sulmi lidhet me një konflikt të caktuar apo me veprimtari kriminale më të gjerë.