FUSHË-KRUJË, 27 gusht 2026 — Një aksident me pasojë vdekjen është regjistruar pasditen e sotme në aksin rrugor Borizanë–Thumanë, ku ka humbur jetën drejtuesi i një automjeti.

Sipas informacioneve paraprake të Policisë, rreth orës 16:40, 62-vjeçari Vatj Leka, banues në Borizanë, dyshohet se ka humbur kontrollin mbi drejtimin e automjetit.

Mjeti ka dalë nga rruga, është përplasur me avllinë e një banese dhe më pas ka përfunduar në kanal. Drejtuesi, i cili udhëtonte i vetëm në automjet, ka marrë plagë të rënda.

Fillimisht u raportua se 62-vjeçari kishte humbur jetën në vendngjarje, ndërsa sipas njoftimit zyrtar të Policisë, ai është transportuar në spital, ku më pas ka ndërruar jetë.

Në vendngjarje kanë mbërritur shërbimet e Policisë dhe grupi hetimor, të cilët po vijojnë punën për të përcaktuar shkaqet dhe rrethanat e aksidentit.

Materialet procedurale do t’i referohen Prokurorisë për veprime të mëtejshme.

Njoftimi i Policisë:

“Krujë/Informacion paraprak. Rreth orës 16:40, në aksin rrugor “Borizanë-Thumanë”, shtetasi V. L., rreth 62 vjeç, dyshohet se ka humbur kontrollin mbi drejtimin e automjetit, i cili ka dalë nga rruga.

Për pasojë, drejtuesi i automjetit ka ndërruar jetë në spital. Vijon puna nga grupi hetimor, për sqarimin e plotë të rrethanave dhe shkakut të aksidentit.”, njofton Policia.