GJERMANI – Dy persona kanë humbur jetën pas një sulmi të rëndë të ndodhur këtë të enjte në një shkollë në Gosen-Neu Zittau, në landin Brandenburg, pranë Berlinit.

Sipas informacioneve paraprake, viktimat janë një 18-vjeçare, nxënëse e shkollës, dhe një 30-vjeçar, i cili dyshohet se ka ndërhyrë në përpjekje për të ndaluar sulmin, por ka mbetur i vrarë.

Policia ka arrestuar një 19-vjeçar, i cili dyshohet se është autori i ngjarjes. Sipas raportimeve fillestare, i riu dyshohet se ka pasur një lidhje të mëparshme me 18-vjeçaren.

Pas sulmit, në zonën e shkollës u zhvillua një operacion i gjerë policor. Forcat e rendit rrethuan perimetrin dhe ndërhynë së bashku me shërbimet e emergjencës për të garantuar sigurinë dhe për të administruar situatën.

Raportimet e para bëjnë fjalë edhe për persona të tjerë të plagosur, por numri dhe gjendja e tyre nuk janë konfirmuar ende zyrtarisht.

Autoritetet gjermane kanë nisur hetimet për të zbardhur dinamikën e plotë të ngjarjes, motivin e sulmit dhe rrethanat që çuan në vrasjen e dy viktimave.