MAQEDONI E VERIUT – Një tjetër person ka humbur jetën në një spital të Shkupit pasi u infektua me virusin e Nilit Perëndimor, duke e çuar në gjashtë numrin e viktimave nga kjo sëmundje në Maqedoninë e Veriut.

Sipas raportimeve të mediave të huaja, viktima e fundit është një 72-vjeçar nga Shkupi, i cili kishte qëndruar i shtruar në spital për rreth 15 ditë për shkak të një gjendjeje të rënduar shëndetësore.

Ndërkohë, autoritetet shëndetësore kanë konfirmuar deri tani 51 raste të infektimit, pjesa më e madhe e të cilave janë regjistruar në zonën e Shkupit.

Rritje e shpejtë e rasteve

Shumica e pacientëve të prekur janë persona mbi 60 vjeç. Disa prej rasteve kanë shfaqur komplikacione të rënda neurologjike, përfshirë encefalitin dhe meningjitin.

Rritja e numrit të rasteve në një periudhë të shkurtër ka shtuar shqetësimin e autoriteteve. Në fund të korrikut ishin raportuar vetëm 8 raste, ndërsa brenda disa javësh shifra ka arritur në 51.

Ky shpërthim epidemiologjik konsiderohet ndër më seriozët në vend vitet e fundit. Virusi i Nilit Perëndimor u regjistrua për herë të parë në Maqedoninë e Veriut në vitin 2011.

Për shkak të përhapjes së virusit, autoritetet kanë shpallur gjendje epidemie në disa komuna të Shkupit dhe kanë forcuar masat për kontrollin e mushkonjave, të cilat janë bartësit kryesorë të virusit.

Paralelisht, po vijon monitorimi epidemiologjik për identifikimin e rasteve të reja dhe kufizimin e përhapjes së infeksionit.