Kryetari i Partisë Demokratike, Sali Berisha, ka hedhur akuza të forta ndaj Prokurorisë lidhur me hetimet për biznesmenin Ergys Agasi.

Në një deklaratë për mediat, Berisha pretendoi se Prokuroria disponon materiale filmike dhe audio të regjistruara në zyrën e Agasit në zonën e Bllokut në Tiranë. Sipas tij, në këtë ambient janë regjistruar takime me ministra, deputetë, drejtues institucionesh dhe zyrtarë të lartë të policisë, gjyqësorit dhe prokurorisë.

Berisha e cilësoi zyrën e biznesmenit si një ambient ku, sipas tij, zhvilloheshin takime të shumta me zyrtarë të lartë.

“Ergys Agasi ka disponuar në zonën më qendrore të Tiranës, një zyrë, studio apo ta quajmë ç’të doni, më e veçanta në llojin e saj në Shqipëri dhe mbase në Evropë. Zyra e Ergys Agasit bënte regjistrime në figurë dhe zë, sapo të hapje derën dhe sapo të dilje nga ajo derë.”

Më tej, Berisha pretendoi se në ambientet e zyrës së Agasit janë paraqitur persona me funksione të larta publike, duke përmendur ministra, drejtorë të përgjithshëm, deputetë, gjyqtarë, prokurorë dhe drejtues të lartë të Policisë së Shtetit.

Ai pretendoi gjithashtu se materialet e regjistruara ndodhen në dispozicion të Prokurorisë.

“Këto fotot, zërat, videot, të gjitha i disponon prokuroria. Ata po fshijnë ministrat, sipas disa burimeve. Ata po fshijnë deputetët, po fshijnë zyrtarët më të lartë.”

Berisha e lidhi këtë pretendim me hetimet ndaj Ergys Agasit, duke akuzuar organin e akuzës se po shmang përgjegjësinë e zyrtarëve të lartë.

Në deklaratën e tij, kreu i PD-së paralajmëroi se, sipas tij, hetimi për aktivitetin e Agasit do të vijojë pavarësisht mënyrës se si po zhvillohet aktualisht.

“Por i garantoj se hetimi i tyre nuk do ndalet ndonjëherë. Nuk ndalet ndonjëherë ai hetim.”

Pretendimet e Sali Berishës për ekzistencën e regjistrimeve dhe mënyrën se si po administrohen ato nga Prokuroria janë deklarata politike dhe nuk janë shoqëruar në këtë material me prova apo një reagim zyrtar nga organi i akuzës.