Një ngjarje e rëndë është regjistruar mëngjesin e sotëm në Tiranë, ku një 74-vjeçar është plagosur rëndë me mjete prerëse pas një konflikti në një pallat në rrugën “Aleksandri i Madh”.

Policia njofton se i dëmtuari, shtetasi me inicialet F. G., 74 vjeç, administrator i pallatit, është sulmuar nga një 35-vjeçar, banor i të njëjtit objekt.

Sipas të dhënave paraprake të policisë, konflikti dyshohet se ka nisur për shkak të linjës së ujit të pijshëm në pallat.

Gjatë përplasjes, 35-vjeçari Klevis Leka dyshohet se ka përdorur një thikë dhe një motorsharrë, duke i shkaktuar plagë të rënda administratorit.

Pas marrjes së njoftimit, shërbimet e Komisariatit të Policisë Nr. 6 kanë mbërritur në vendngjarje dhe kanë nisur menjëherë veprimet për identifikimin dhe kapjen e autorit të dyshuar.

Në vijim të veprimeve hetimore dhe operacionale, policia ka arrestuar Klevis Leka, 35 vjeç, banor i pallatit ku ndodhi ngjarja.

Gjatë ndërhyrjes, uniformat blu kanë sekuestruar edhe mjetet prerëse që dyshohet se janë përdorur në sulm, konkretisht një thikë dhe një motorsharrë.

74-vjeçari është transportuar në spital, ku po merr trajtimin e nevojshëm mjekësor dhe ndodhet nën kujdesin e mjekëve.

Materialet procedurale i janë referuar Prokurorisë, ndërsa hetimet vijojnë për të dokumentuar plotësisht rrethanat e ngjarjes dhe përgjegjësinë e autorit të dyshuar.

Njoftmi i Policisë:

Tiranë Plagosi rëndë, me mjete prerëse, administratorin e pallatit ku banonte, shërbimet e Komisariatit të Policisë Nr. 6 arrestojnë menjëherë pas krimit, autorin. Sekuestrohen mjetet prerëse (thikë dhe motorsharrë).

Shërbimet e Komisariatit të Policisë Nr. 6, menjëherë pas njoftimit të mëngjesit të sotëm, se në ambientet e një pallati në rrugën “Aleksandri i Madh”, ndodhej i dëmtuar administratori i objektit, shtetasi F. G., 74 vjeç, shkuan në vendngjarje për të sqaruar autorësinë dhe rrethanat e rastit.

Si rezultat i veprimeve të shpejta hetimore dhe operacionale, u identifikua dhe u arrestua menjëherë pas kryerjes së krimit, autori i dyshuar, shtetasi K. L., 35 vjeç, banor i këtij pallati.

Nga veprimet e deritanishme hetimore dyshohet se 35-vjeçari ka plagosur rëndë, me mjete prerëse, 74-vjeçarin, gjatë një konflikti për linjen e ujit të pijshëm në këtë pallat. I dëmtuari është transportuar në spital, ku është në kujdesin e mjekëve.

Materialet procedurale iu referuan Prokurorisë, për veprime të mëtejshme, me qëllim zbardhjen dhe dokumentimin e rrethanave të këtij rasti.