Ngjarje shqetësuese ka ndodhur në Tiranë, një burrë ka plagosur rëndë me thikë administratorin e pallatit ku banonte.

Shërbimet e Komisariatit të Policisë Nr. 6 arrestojnë pas krimit, autorin e dyshuar ndërsa u sekuestruan mjetet prerëse (thikë dhe motorsharrë).

Ngjarja ndodhi mëngjesin e sotëm në ambientet e një pallati në rrugën “Aleksandri i Madh”, në zonën e Astirit në Tiranë.

Autori i dyshuar Klevis Leka, 35 vjeç, banor I këtij pallati, akuzohet se ka plagosur rëndë me thikë dhe madje edhe me motosharrë, administratorin e pallatit.

Policia tha se është njoftuar nga banorë që kanë parë pranë pallatit se ndodhej i plagosur administratori i objektit, shtetasi F. G., 74 vjeç.

Forcat policore shkuan në vendngjarje për të sqaruar autorësinë dhe rrethanat e rastit.

Pas veprimeve të para u identifikua dhe u arrestua menjëherë pas kryerjes së krimit, autori i dyshuar, shtetasi Klevis Leka, 35 vjeç, banor i këtij pallati.

Nga veprimet e deritanishme hetimore dyshohet se 35-vjeçari ka plagosur rëndë, me mjete prerëse, 74-vjeçarin, gjatë një konflikti për linjën e ujit të pijshëm në këtë pallat.

I dëmtuari është transportuar në spital, ku është në kujdesin e mjekëve.

Materialet procedurale iu referuan Prokurorisë, për veprime të mëtejshme, me qëllim zbardhjen dhe dokumentimin e rrethanave të këtij rasti. /noa.al