Një email me përmbajtje kërcënuese dhe terroriste është dërguar mëngjesin e së enjtes në adresat elektronike të disa institucioneve në qytete të ndryshme të vendit, duke shkaktuar angazhimin e menjëhershëm të strukturave të Policisë së Shtetit.

Në mesazh pretendohet se në ndërtesat e institucioneve është vendosur një bombë dhe se ajo do të shpërthejë brenda dy orësh. Autorët e mesazhit pretendojnë se i përkasin organizatës terroriste ISIS.

Pas marrjes së njoftimit, strukturat e Policisë së Shtetit kanë nisur kontrollet dhe verifikimet në institucionet e përfshira në kërcënim.

Sipas policisë, nga kontrollet e kryera deri tani nuk është konstatuar prani bombe apo ndonjë lloj tjetër eksplozivi.

Paralelisht, Drejtoria për Hetimin e Krimeve Kibernetike, në bashkëpunim me Drejtorinë e Antiterrorit dhe agjenci të tjera ligjzbatuese, po punon për identifikimin e autorit dhe gjurmimin e adresës elektronike nga e cila janë dërguar kërcënimet.

Policia e Shtetit u ka bërë thirrje qytetarëve të ruajnë qetësinë, duke theksuar se nuk ka vend për panik dhe se strukturat ligjzbatuese vijojnë të jenë të angazhuara për garantimin e sigurisë publike.

Hetimet për verifikimin e plotë të kërcënimit dhe identifikimin e personit ose personave përgjegjës vijojnë.