Të dhënat po ngarkohen...
Transmetuar më 26-08-2026, 23:02
TIRANË — Prokuroria e Posaçme Kundër Korrupsionit dhe Krimit të Organizuar (SPAK) ka publikuar njoftimin zyrtar për arrestimin e biznesmenit Ergys Agasi, duke bërë të ditur detajet e operacionit, periudhën gjatë së cilës ai ka qenë në kërkim dhe akuzat për të cilat po hetohet.
Sipas SPAK, Agasi u arrestua më 26 gusht 2026, pas disa javësh punë nga strukturat e specializuara të Policisë së Shtetit dhe Byrosë Kombëtare të Hetimit (BKH).
Ai u kap në autostradë, në hyrjen jugore të Durrësit, në zonën e Plepave. Në momentin e arrestimit, Agasi shoqërohej nga shtetasi U. Sh., i identifikuar si Uljan Shpataraku, ish-punonjës policie.
Shpataraku është arrestuar në flagrancë për veprën penale “Përkrahja e autorit të krimit”, të parashikuar nga neni 302/2 i Kodit Penal.
Në kërkim prej dhjetorit 2025
SPAK bën me dije se Agasi ishte regjistruar si person nën hetim më 5 dhjetor 2025, në kuadër të procedimit penal nr. 20/1.
Më pas, me vendimin nr. 125, datë 15 dhjetor 2025, Gjykata e Posaçme e Shkallës së Parë për Korrupsionin dhe Krimin e Organizuar (GJKKO) kishte caktuar ndaj tij masën e sigurisë “Arrest në burg”.
Vendimi i ishte përcjellë Policisë së Shtetit për ekzekutim më 17 dhjetor 2025. Për rrjedhojë, Agasi rezultonte zyrtarisht në kërkim prej më shumë se tetë muajsh, deri në arrestimin e tij në Durrës.
Akuzat që rëndojnë mbi Agasin
Sipas njoftimit të SPAK, Agasi po hetohet për një sërë veprash penale, të cilat lidhen me aktivitet kriminal, tenderat publikë, korrupsionin dhe pastrimin e parave.
Në listën e veprave penale të referuara nga SPAK përfshihen:
Konkurrenca e paligjshme nëpërmjet dhunës, sipas nenit 170/b të Kodit Penal; Heqja e paligjshme e lirisë, sipas nenit 110; Shkelja e barazisë së pjesëmarrësve në tendera ose ankande publike, në formën e grupit të strukturuar kriminal; Korrupsioni aktiv i personave që ushtrojnë funksione publike, i kryer në bashkëpunim dhe më shumë se një herë; Pastrimi i produkteve të veprës penale ose veprimtarisë kriminale, sipas nenit 287; Grupi i strukturuar kriminal dhe kryerja e veprave penale nga organizata ose grupi i strukturuar, sipas neneve përkatëse të Kodit Penal. Arrestimi i Agasit është pjesë e hetimeve të SPAK për procedimin penal që lidhet edhe me AKSHI-n, ndërsa hetuesit po vijojnë veprimet për dokumentimin e plotë të rolit të personave të dyshuar dhe lidhjeve mes tyre.
Akuzat e mësipërme përfaqësojnë dyshimet e organit të akuzës dhe nuk përbëjnë një vendim fajësie. Ergys Agasi dhe personat e tjerë të hetuar prezumohen të pafajshëm deri në një vendim gjyqësor të formës së prerë.
Njoftimi i SPAK:
"Pas një pune disa javore në bashkëpunim të ngushtë me strukturat operacionale të specializuara të Policisë së Shtetit dhe Byrosë Kombëtare të Hetimit, sot më datë 26.8.2026, u bë i mundur arrestimi i shtetasit Ergys Agasi, në hyrjen jugore qytetit të Durrësit, në zonën e Plepave, në autostradë. Në momentin e arrestimit ky shtetas shoqërohej nga shtetasi, U. Sh, ish punonjës policie, i cili është arrestuar në flagrancë për veprën penale “Përkrahja e autorit të krimit” e parashikuar nga neni 302/2 i Kodit Penal.
Prokuroria e Posaçme Kundër Korrupsionit dhe Krimit të Organizuar vijon hetimet për procedimin penal nr. 20/1 të vitit 2025, për të cilin, më datë 05.12.2025, ka regjistruar edhe emrin e shtetasit Ergys Agasi. Ky shtetas po hetohet për kryerjen e veprave penale: “Konkurrenca e paligjshme nëpërmjet dhunës”, “Heqja e paligjshme e lirisë”, “Shkelja e barazisë së pjesëmarrësve në tendera apo ankande publike” e kryer në formën e veçantë të bashkëpunimit atë të grupit të strukturuar kriminal dhe “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, si dhe “Pastrimi i produkteve të veprës penale ose veprimtarisë kriminale” të parashikuara nga nenet 110, 170/b e 28/4, 258, 287 dhe 333/a dhe 334 të Kodit Penal, “Korrupsioni aktiv i personave që ushtrojnë funksione publike”, të kryer në bashkëpunim, më shumë se një herë, parashikuar nga neni 244 paragrafi i dytë i K. Penal.
Ndaj personit nën hetim dhe konkretisht shtetasit Ergys Agasi, me vendimin nr. 125 datë 15.12.2025, të Gjykatës së Posaçme të Shkallës se Pare Për Korrupsionin dhe Krimin e Organizuar, është caktuar masa e sigurisë “arrest në burg”, parashikuar nga neni 238 i K. Pr. Penale. Vendimi i gjykatës është dërguar menjëherë për tu ekzekutuar nga strukturat e Policisë së Shtetit me shkresën nr. 43104 prot, dt.17.12.2025.
Struktura e Posaçme kundër Korrupsionit dhe Krimit të Organizuar falenderon Policinë e Shtetit për kryerjen me sukses të operacionit."
Shënim: Çdo person që mund të përmendet në përmbajtjen e këtij artikulli, mbështetur mbi parimin procedural penal dhe atë universal të prezumimit të pafajësisë, konsiderohet i pafajshëm penalisht, nëse nuk ka ose deri kur të ketë një vendim të formës së prerë.
Shënim: Në disa lajme, imazhet gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
Bashkohu me kanalin e NOA WhatsApp për lajmet më të fundit direkt në celularin tënd