TIRANË — Operacioni policor i koduar “The Wanted” vijon edhe në kryeqytet, pak orë pas arrestimit të Ergys Agasit dhe ish-efektivit të policisë Uljan Shpataraku në Durrës.

Menjëherë pas arrestimit të tyre në zonën e Plepave, forcat e policisë kanë ndërmarrë veprime të tjera hetimore në “Liqenin e Thatë”, në Tiranë.

Kontroll në banesën e Shpatarakut Efektivët e policisë kanë ushtruar kontroll në banesën e Uljan Shpatarakut.

Sipas të dhënave paraprake, gjatë kontrollit hetuesit po këqyrin ambientet e banesës, me qëllim gjetjen dhe sekuestrimin e pajisjeve elektronike, dokumenteve apo sendeve të tjera që mund të kenë vlerë për hetimin.

Veprimet procedurale po zhvillohen në kuadër të hetimeve të SPAK për dosjen e Agjencisë Kombëtare të Shoqërisë së Informacionit (AKSHI).

Hetohen lidhjet mes Shpatarakut dhe Agasit Kontrolli në banesën e ish-efektivit konsiderohet pjesë e veprimeve për të dokumentuar rolin e tij të dyshuar në çështjen nën hetim, si dhe marrëdhëniet e tij me Ergys Agasin.

Agasi dhe Shpataraku u arrestuan në Durrës pasi u lokalizuan në të njëjtin automjet. Sipas Policisë së Shtetit, operacioni u zhvillua në bashkëpunim me SPAK.

Ndërkohë, pritet që autoritetet të publikojnë detaje të tjera mbi kontrollet dhe rezultatet e operacionit gjatë vijimit të veprimeve hetimore.

Personat e përfshirë në hetim prezumohen të pafajshëm deri në një vendim gjyqësor të formës së prerë.