TIRANË — Janë publikuar pamjet e momentit kur Ergys Agasi, i arrestuar këtë të mërkurë në Durrës, mbërrin në ambientet e Drejtorisë Vendore të Policisë së Tiranës.

Në video, Agasi shfaqet i rrethuar nga forca të shumta policie, me pranga në duar, shapka, një bluzë të bardhë dhe pantallona të shkurtra, teksa ngjit shkallët e godinës së policisë.

Në Drejtorinë e Policisë së Tiranës kanë mbërritur edhe agjentë të Byrosë Kombëtare të Hetimit (BKH), të cilët pritet të kryejnë procedurat për ekzekutimin e masës së sigurisë ndaj tij.

U arrestua në Durrës pas ndjekjes nga Elbasani

Agasi u arrestua mbrëmjen e së mërkurës në zonën e Plepave, në Durrës, ku ndodhej pasagjer në një automjet të drejtuar nga ish-efektivi i policisë Uljan Shpataraku.

Sipas të dhënave të bëra publike nga policia, Agasi ishte lokalizuar fillimisht në Elbasan, ndërsa ndjekja vijoi në drejtim të Durrësit, ku operacioni përfundoi me arrestimin e dy personave.

Agasi ishte shpallur në kërkim që prej dhjetorit 2025, kur SPAK lëshoi urdhër-arrestin ndaj tij në kuadër të hetimeve për dosjen e Agjencisë Kombëtare të Shoqërisë së Informacionit (AKSHI).

Dyshimet e SPAK

Prokuroria e Posaçme dyshon se Agasi, së bashku me biznesmenin Ermal Beqiraj, ka pasur rol në një grup të strukturuar kriminal të dyshuar për manipulimin e procedurave të tenderimit të AKSHI-t.

Hetimi përfshin edhe dyshime për vepra të tjera penale, ndërsa roli konkret i secilit prej personave të përfshirë pritet të përcaktohet gjatë procedurave gjyqësore.

Ndërkohë, Uljan Shpataraku ishte shpallur në kërkim më 6 gusht, pas një incidenti në Dhërmi. Sipas të dhënave të bëra publike, ai dyshohet se pas një konflikti në një lokal kishte kërcënuar me armë kamarierin dhe administratorin.

Personat e përfshirë në hetim prezumohen të pafajshëm deri në një vendim gjyqësor të formës së prerë.