DURRËS — Janë publikuar pamjet e para të Ergys Agasit pas arrestimit të tij në Durrës, në kuadër të operacionit të Policisë së Shtetit për kapjen e personit të shpallur në kërkim nga SPAK.

Në fotografitë e publikuara, Agasi shfaqet me pranga në duar dhe brenda një automjeti të Policisë, ndërsa po shoqërohej pas arrestimit.

Agasi u arrestua në zonën e Plepave, ku u kap brenda një automjeti së bashku me ish-zyrtarin e policisë Uljan Shpataraku. Sipas të dhënave të bëra publike nga autoritetet, dy personat kishin udhëtuar nga Elbasani në drejtim të Durrësit, përpara se të lokalizoheshin dhe ndaloheshin nga forcat e policisë.

Arrestimi u krye në kuadër të operacionit të koduar “The Wanted”, të finalizuar nga strukturat e Policisë së Shtetit në bashkëpunim me SPAK.

Agasi ishte shpallur në kërkim në kuadër të hetimeve për dosjen e AKSHI-t, ku ndaj tij janë ngritur dyshime për përfshirje në veprimtari kriminale të lidhura me procedurat e tenderimit.

Pas arrestimit, Agasi është shoqëruar për procedurat e mëtejshme ligjore, ndërsa hetimet e SPAK vijojnë.

Personat nën hetim prezumohen të pafajshëm deri në një vendim gjyqësor të formës së prerë.