DURRËS — Policia e Shtetit ka dhënë detaje zyrtare për arrestimin e biznesmenit Ergys Agasi, një prej personave të shpallur në kërkim në kuadër të hetimeve të SPAK për dosjen e AKSHI-t.

Bashkë me Agasin është arrestuar edhe Uljan Shpataraku, ish-zyrtar i Policisë së Shtetit, i cili udhëtonte në të njëjtin automjet me personin e shpallur në kërkim.

Operacioni, i koduar “The Wanted”, u finalizua nga Drejtoria Vendore e Policisë Durrës dhe strukturat operacionale të Drejtorisë së Përgjithshme të Policisë së Shtetit, në bashkëpunim me SPAK.

Në njoftimin zyrtar, policia bën me dije se në Durrës u kap shtetasi E. A., i shpallur në kërkim nga SPAK, ndërsa në kuadër të operacionit u kap dhe u arrestua edhe shtetasi U. Sh.

Nga Elbasani në Durrës, si u ndoqën

Sipas të dhënave të bëra publike, Agasi u pikas fillimisht nga efektivët e Forcës Operacionale në Elbasan.

Pas lokalizimit të automjetit, ndjekja vijoi në drejtim të Durrësit, përmes Peqinit dhe Rrogozhinës. Operacioni përfundoi në zonën e Plepave, në Durrës, ku Agasi dhe Shpataraku u arrestuan.

Policia nuk ka dhënë detaje të tjera mbi momentet e ndjekjes, ndërsa hetimet vijojnë në bashkëpunim me SPAK.

Shpataraku, ish-zyrtar i Policisë së Shtetit

Uljan Shpataraku është një ish-punonjës i Policisë së Shtetit. Sipas të dhënave të bëra publike, më 6 gusht ai ishte shpallur në kërkim nga Policia e Himarës, pas një kallëzimi të bërë nga punonjës të një hoteli në Dhërmi.

Punonjësit e hotelit kishin pretenduar se ishin kanosur dhe kërcënuar pas një debati verbal me Shpatarakun.

Më herët, më 20 maj, Shpataraku ishte përjashtuar nga Policia e Shtetit me urdhër të drejtuesit Skënder Hita, pasi kishte qenë i pezulluar. Ai mbante detyrën e asistentit në Departamentin për Teknologjinë e Informacionit në Policinë e Shtetit.

Dosja e AKSHI-t

Në kuadër të hetimeve për dosjen e AKSHI-t janë nën hetim edhe ish-drejtuesja e institucionit Mirlinda Karçanaj dhe biznesmeni Ermal Beqiraj, i cili u arrestua një muaj më parë në Francë.

Sipas hetimeve, ndaj personave të përfshirë janë ngritur dyshime për një sërë veprash penale, ndër të tjera grup i strukturuar kriminal, konkurrencë e paligjshme nëpërmjet dhunës, heqje e paligjshme e lirisë, shkelje e barazisë në tendera dhe pastrim parash.

Hetimet e SPAK vijojnë për të përcaktuar rolin e secilit prej personave të përfshirë në këtë çështje.

Personat nën hetim prezumohen të pafajshëm deri në një vendim gjyqësor të formës së prerë.