DURRËS — Policia e Shtetit ka konfirmuar zyrtarisht arrestimin e Ergys Agasit dhe Uljan Shpatarakut, në kuadër të operacionit policor të koduar “The Wanted”.

Operacioni është finalizuar nga Drejtoria Vendore e Policisë Durrës dhe strukturat operacionale të Drejtorisë së Përgjithshme të Policisë së Shtetit, në bashkëpunim me Prokurorinë e Posaçme Kundër Korrupsionit dhe Krimit të Organizuar (SPAK).

Sipas njoftimit zyrtar, në Durrës është kapur shtetasi E. A., i shpallur në kërkim nga SPAK. Në kuadër të të njëjtit operacion është kapur dhe arrestuar edhe shtetasi U. Sh., i cili udhëtonte në të njëjtin automjet me personin e kërkuar.

Bëhet fjalë për Ergys Agasin dhe Uljan Shpatarakun, emrat e të cilëve ishin raportuar më herët në lidhje me hetimin e SPAK për dosjen e AKSHI-t.

Arrestimi është kryer në Durrës pas lokalizimit të automjetit me të cilin udhëtonin dy personat.

Policia nuk ka bërë ende publike detaje të tjera mbi rrethanat e ndalimit dhe akuzat konkrete ndaj të arrestuarve, ndërsa hetimet vijojnë nën drejtimin e SPAK.

Policia e Shtetit

Finalizohet operacioni policor i koduar “The Wanted”

Drejtoria Vendore e Policisë Durrës dhe strukturat operacionale të Drejtorisë së Përgjithshme të Policisë së Shtetit, në bashkëpunim me Prokurorinë e Posaçme kundër Korrupsionit dhe Krimit të Organizuar (SPAK), finalizuan operacionin e koduar “The Wanted”.

Si rezultat i operacionit, në Durrës u kap shtetasi E. A., i shpallur në kërkim nga SPAK-u.

Në kuadër të operacionit, u kap dhe u arrestua edhe shtetasi U. Sh., i cili udhëtonte në të njëjtin automjet me personin e kërkuar E. A.