Vizita e drejtorit të CIA-s, John Ratcliffe, në Moskë mbetet e rrethuar nga misteri. Deri më tani nuk është bërë e ditur se me cilët zyrtarë rusë është takuar dhe çfarë është diskutuar gjatë qëndrimit të tij në kryeqytetin rus.

E vetmja gjë që është konfirmuar publikisht nga Kremlini është se Ratcliffe nuk është takuar me presidentin rus, Vladimir Putin.

“Takime me Putinin nuk janë planifikuar”, deklaroi zëdhënësi i Kremlinit, Dmitry Peskov, për agjencinë shtetërore ruse të lajmeve TASS.

Ky ishte udhëtimi i parë zyrtar i njohur i Ratcliffe në Rusi. Drejtori i CIA-s ka mbajtur kontakte me homologun e tij rus, Sergei Naryshkin, kreun e Shërbimit të Inteligjencës së Jashtme të Rusisë (SVR), i cili më herët ka shprehur gatishmërinë për t’u takuar me të.

Peskov i tha gjithashtu The Washington Post se vizita lidhej me “kontaktet midis shërbimeve të sigurisë”, pa dhënë detaje mbi përmbajtjen e bisedimeve.

Një zyrtar amerikan kishte konfirmuar më herët për Kyiv Independent se drejtori i CIA-s do të zhvillonte takime me zyrtarë të lartë rusë. Megjithatë, mbetet e paqartë se cilët ishin konkretisht bashkëbiseduesit e Ratcliffe dhe cilat çështje u diskutuan.

Ukraina ishte informuar për vizitën

Sipas një burimi të njohur me çështjen, pala ukrainase ishte informuar se një delegacion amerikan do të udhëtonte drejt Rusisë, por fillimisht nuk ishte në dijeni se pjesë e tij do të ishte edhe Ratcliffe.

Zyrtarët ukrainas pritet të informohen mbi rezultatet e vizitës. Ende nuk dihet nëse Ratcliffe do të udhëtojë drejt Kievit për t’i informuar personalisht.

Ndërkohë, sipas Axios, Shtetet e Bashkuara i kanë kërkuar Ukrainës të mos kryejë sulme ndaj Moskës apo Shën Petersburgut gjatë kohës që drejtori i CIA-s ndodhej në Rusi.

Vizita zhvillohet në një moment delikat

Udhëtimi i Ratcliffe në Moskë vjen në një periudhë kur Uashingtoni dhe Moska kanë intensifikuar kontaktet dypalëshe nën administratën e presidentit Donald Trump.

Trump, i cili mori detyrën në janar 2025, është zotuar të negociojë për përfundimin e luftës në Ukrainë. Megjithatë, pavarësisht kontakteve të vazhdueshme dhe vizitave në Moskë të të dërguarve amerikanë Steve Witkoff dhe Jared Kushner, negociatat e paqes kanë mbetur të bllokuara, kryesisht për shkak të mosmarrëveshjeve të thella mbi territorin.

Witkoff dhe Kushner kishin planifikuar gjithashtu të vizitonin Ukrainën këtë javë, por udhëtimi është shtyrë.

Sipas një burimi, shtyrja nuk lidhet me përshkallëzimin e sulmeve ruse. Burimi tha se Trump dëshironte t’i mbante dy të dërguarit pranë tij për shkak të situatës së tensionuar dhe bllokimit të negociatave me Iranin.

Kreu i ekipit negociator ukrainas, Rustem Umerov, zhvilloi një bisedë telefonike me Witkoff më 23 gusht. Sipas të njëjtit burim, Witkoff është zotuar se do ta vizitojë Ukrainën në një datë të mëvonshme.

Kanalet SHBA-Rusi mbeten të hapura

Pavarësisht ngecjes së negociatave për luftën në Ukrainë, Shtetet e Bashkuara dhe Rusia kanë ruajtur kanalet e komunikimit.

Këto kontakte kanë kontribuar edhe në arritjen e marrëveshjes së 11 gushtit për lirimin e ish-marinsit amerikan Robert Gilman, i cili kishte kaluar katër vjet i burgosur në Rusi.

Megjithatë, takimet e Ratcliffe në Moskë dhe temat e diskutuara mbeten ende të pazbardhura. Mungesa e informacionit zyrtar ka ushqyer spekulimet mbi natyrën e kontakteve dhe rolin e tyre të mundshëm në përpjekjet amerikane për të mbajtur të hapura kanalet e komunikimit me Moskën.